– Soseda Jana, prosim lepo otprite joči, ajde idemo, pomalem. Neje kraj sveta ako nam se Purger ženi. Mora se, a kaj bo? Dete bo ostalo fačuk? Ajde vi ste spametna žena. A imate još onu rakiju malo vu flaši? Dete pe po vulici i kaj mu bodo vikali, ha? Fa – čuk ! Pur – ger! Aleluja! To očete našemu pajdašu? Kaj bomo si patili kaj nas je gord? No, znam da to detetu nečete!
– To je ne Purgerovo dete! Računala sem ja saki pot dok su bili skupa. Računala sem kak ti rakiju i predi se bo rakija prevrgla v sok nego kaj ja pogrešila.
– Što se bo prevrgel? Rakija? Pak ste ne valjda to i pri meši Bogeka prosili? Za pet ran, kaj vam je dospelo? Tablete pijete i unda vam je v glavi znapak? Rakija nek bo rakija i kvit!
Mogli ste Božeka prositi kaj se Purger ne oženi, a ne vi idete v takve stvari koje bi se ljefko zakompljicerale. Majko moja mila, idete v te ionak dosta haklik stvari i rakiju napljetat. Nigdar sem vam to ne rekel. Sram vas bilo!
– Lampaj ti kaj očeš, to je ne njegvo dete. A niti ti naboš gospodski prešel. Ja sem si jako dogo premišljavala. Ti si mlajši, elj nemaš več kaj čakati. Moral bi se oženiti! Ako se purger i ona lažljifka venčaju, mi bomo zgubljeni skroz. Mislim da naš mogel zbeči. Venčali se bomo i ti i ja!
– Soseda Jana, de vam je to vračtvo? Nit ste normalni vi, a niti doktor koj vam je to dal. Ve, ve, venčal kaj se? Bo me na mestu ftrefilo, de ste rekli da je ona rakija koja je vu flaši ostala? A lepo sem rekel napišite si na paper po vulicama se stare dečke i dofce, sedem nogometni ekipi ljefko skup denete. De ste baš mene našli?
– Pa kaj, drva boš cepal, kokoši pipljal, v jutro peš po kruha, po novine i tak, se po redu. Nikaj nam nabo faljilo. Moja penzija nam bo dosta.
A kaj mislite, ako je ne dete njegvo? Unda se ništo nabo venčal? Dejte si sedite za stol. Bodite spametni. Ve ste mi prafzaprav otpreli joči. Dete je ne njegvo! Ako ste vi računali i velite da ona laže, unda je sigurno da laže. Smestila mu je, a ve vi očete smestiti meni. Kaj rešimo stvar, dete je ne njegvo i to je naša zadnja. Dejte mi štamperljin rakije, se drfčem!
– Neje samo to, Ivek. Puno sem ja gruntala si v glavi. Dok je Purger bil mali i z japicom bil f šumi, gožve su išli poseči kaj bo za snope kuruzinja, maloga je vgrizel klopec.
Imel je veljko vručinu, bil je jako betežen. Japica Gusti su rekli, no, ve su mu jajca hmak i more ž njim komot obloke prati.
-S čem, soseda Jana?
-S pimpekom, Ivek, s pimpekom. Jako mi je žal kaj sem se toga prije ne zmislila, nebi ga ona delala z bedakom.
– Soseda Jana, ja vam nikaj ne razmem, ali ve mi lepo se po redu rečite, kaj nam pred Purgerom kaj kriv.
– A ne. Idemo mi k nje. Direktno. Nabo ona z nikoga delala bedaka! A Purger, ako nam ne veruje, nek si ide pitat mater kaj njim je doktor rekel dok se to dogodilo. Fljundra jena prefrigana gradska! Što zna kot se smucala i što ji ga naprajil.
– Soseda Jana, pijete tablete… morti… a ona bo skoro za mesec dni rodila.
– Bedak jen, ne pijem ja otrova. Onu žganicu sem na dušu spila, za koju si pital?
– Baš do zadnje kapi?
– Se. Do zadnje kapi. Bom morala drugu otpreti.
– Imate drugu?
– Ivek, to je ve ne važno. Ti i ja idemo direkt k njoj.
– Ste vi normalni? Purger ima gripu i ako bo čul…
– Baš zato. Ve ju bomo stisnuli na fintu. Rečemo da smo čuli…
– E, nemre tak. Ja sem ne čul nikaj…
– Ali sem ja čula. Ne ti je to Ivekovo dete. Samo kaj si nateknem kaputa. I mene lovi nekva crkavica.
– Ja pak sem gotov. Kaj bo naš pajdaš rekel? Sam si bom jamu skopal, a kak se bote vi obračunali, briga me dok bom mrtev.
POD VERONIKINEM OBLOKOM
– Vidiš isto kaj i ja? Ivek, de si?
– Čakajte me soseda Jana, čižma mi se zagrabila. Prokleti dešč, baš je ve moral grabe poponiti. Ne vidim nikaj. Nejte na grunt, kmica je.
– F kuhnji se sveti. Z grunta bomo dobro vidli. Ivek, vidiš morti kaj i ja?
– Ne vidim čez ljesu. Premali sem.
– Na gruntu, tam skoro pri škednju je Mercedes. Črni kak črna kmica.
– Amnajte, soseda Jana. Časna reč?
– Idemo bliže. Samo postiha. Moreš stati na babinu od koružnjaka…
– A ne… jempot sem nutri popeval, nigdar več.
– Unda hodi na verandu. Vidi ji se direkt v kuhnju. Ne hlopči z čižmom!
– Stvarno se vidi. Soseda Jana, što je to?
– Vidiš i sam. Kaj naš rekel da sem stara ili betežna.
– Majkica moja, mila i predraga, kaj časna hmira kaj si je pozvala veličasnoga? Soseda Jana, ja sem toga čoveka ne nigdar videl.
– E vidiš Ivek. Ve ti je prilika kaj ga boš pital kak se zove.
– Soseda Jana. Soseda Jana! Pak oni se kušuju! Soseda Jana, idemo dimo.
– Nemremo iti dimo, moramo pitati čoveka kak se zove.
– Prosim najljepše, nejdite nuter. Soseda Jana, ja idem dimo. Pustite mi kaputa! Rokava mi bote strgali! Zakaj ste pokočili po kuhinjski vrati? Majko moja mila, spasi me.
– Nemremo iti dimo. Kaj bomo rekli Purgeru? Niti namo znali kak je ime čoveku koj mu je zaručnicu kušuval.
– Bogme ju kušuje.
Kuhinjska vrata su se otprla i soseda Jana i Ivek su v jen glas rekli
– Dober večer.
– Iščemo Iveka – znašli su se soseda Jana
– Dobra večer – Veronika je postala bleda kak krpa.
– Ivek je bolestan – rekla je Veronika.
– A kak se zove of gospon koj te kušuje? Prosila bi lepo. Kaj nam Iveku krivo ime povedala…
