Nesem političar, elj drage moje Međimurke i Međimurci i ostali, već dva tjene je moj život poprijel drugu dimenziju. Hodam kak nedoklana kokoš, spat idem v osem vur i željem si kaj se v jutro zbudim bister i spameten. Niti se budim bister, niti spameten, jedino kaj otprem joči i pak sem na istem.
Znači, samo se budim. Probam se zmisliti kaj je krenulo znapak, mislim ta moja velika ljubaf, ljepo je bilo, nemrem nikaj reči, dekla koja je bila ljubav moje mladosti. Očem kaj mi bo žena do starosti.
To vam je vrag, ta mladost, moreš si radi jene bedastoče rane lizati celoga života. Moj japica, čem su naprajli moju mamu, rekli su mamici, svoji ženi, kaj je to za dete, samo skernjefči, nit za mam kaj je žensko.
Oni su se dva sako malo posvadili i riglja je letala za japicom saki pot dok bi zajebavali, a zajebavali su saku večer. Dok su mamica skuhali za večerju žgance z vrhnjem, japica su reklji, sem misljil da su z maščom i tak je to bilo z dena v den. To sem vam ne nigdar rekel, mamica su mi bili jako frčna i vredna žena.
Jako gosto su kuhali žgance jer nam je sosed Mikloš bil mlinar i navek je mamicu vabil kaj dojde na večer po toplo melju. Japica su se z dečki kartalji i što zna kaj su meli mamica i mlinar, potmajen je bil i žene su za njim bile stekle. Nebi mogel reči zakaj je bil na dobrem glasu, em je fkanjuval za kopanjku melje, em su se nekoje žene tožile da njim se obrisal toboš, pak su sebe melju stepale.
Samo sem čul, onak sem se popljetal pred krčmom dok je krčmarica rekla da su se dečki napili i da su si je merili i da je mlinar imel najvekšega. Bilo me malo sram, elj baš je tak rekla.
Jeno ljeto dok sem bil na feriju pri japici, mamica su došli meljnati z vrečencem, ja bi dal roku v jogenj da su morti pali v škatulju z meljom. A unda su, drugi celi den popevali kak pevačica f krčmi. Vesela žena, čudno malo, ne? Japica kak japica, nesu oni na to računali, se dok njim je nekvo dete na vulici obesilo se za rud na kolima i zaviknulo:
– Počem melja, gazda?
Dete je skočilo doli i odbežalo, vrag bi si ga znal čije je. Japici su se unda tek klikeri v glavi vužgali. Došli su dimo, fanj pod gasom i stali pred mamicu.
– Nekaj bi te pital, draga moja. Kak ide ona pesma, ma naša je, dečkima sem štel snočka popevati pak sem se ne mogel reči zmisliti.
– Koja, Gusti?
– Ma ona, išla žena v melin, nesla vreče, kak ide dalje? Mamica su se začerleneli, i počeli vikati na japicu.
– Kaj ve očeš s tem reči? Da sem nepoštena, ha? Ve si štel reči da imam nekaj z mlinarom Miklošom? Nek te bu sram, sto put nek te bu sram čoveka tak na špot devati – mamica su ponoreli.
– Naj mi reči, draga moja, melja je snočka bila po celi hiži! Naj ga na špot devati! Kaj mi naš povedala? A moram. Moram! Čem se s tebom spljel, Bok mi grehe prosti. Zato ti mene šopaš z žganci? A na najži visiju šunke i lopatice? I klobasi za koje sem tijam v Zagrebu v oni zagorski mesnici dobil recepta za naprajti.
– Gustek!? Kaj to prepovedaš?
– Aha, ve bom i Gustek? A ne, draga moja. Dosta je bilo. Ti se kurvaš!! Kurvaš se z mlinarom Miklošom. Zato je on dišel več dva pot z krčme dok sem se ja podel! Zato?? Reči mi! Kaj nam zeznal od sestre mu Ruže, unda bolje da te nega! Prodal te bom v Zagrebu na pijacu kak ofurjenu racu! Si me razmela?
-Jezuš moj milostivi, kaj to prepovedaš? Snočka mi je melja pala pak mi je pomogel nazaj zdiči i tak sem odišla.
– Aha, tu smo! Prijel te znači za plječe. Morti za rit? Reči mi najempot! Za nekaj te moral prijeti dok ti je vreče nametal kaj boš nesla. Pokaži mi mam – vikali su japica.
– Dosta je bilo! Da se vreče moglo samo nesti, nebi me ništo bil za nikaj prijel.
– Aha, to je to. Dok te ja domaj čakam kak bik i čuvam kaj na kaj znapak, ti se kurvaš. E nabo to več tak, draga moja. Ja si bom zel divana z kuhnje i gosaka Gustija i mi se selimo v škedenj. A ti si ječ žgance. Sejeno si črevasta kak vreča kalampera. A ja od zutra za zajtrek jem špeka i klobase!
E vidite, to je pravi muški. Junački se odselil od žene bez da je počilo z puške. No mamica su se ne več žurili v mlin dok se smrkne. Itak je dober strah komu ga Bog dal.
A znate kaj je prava istina? Japici se, kak su se hapilji piti, ne več štel zdiči, pak su se štelji zvleči kak junak. I bogme tak je i bilo. Japica su počeli spati sami v škednju, a mamica su ne vupali z grunta.
No, da se vrnem na svoj problem. Nečem kaj mi se narodi fačuk! Ja očem svoju Veroniku i naše dete. Kaj pak ji se, majko moja, dogodilo kaj je tak naprajla? Rekla je da se slekla z halje i da se bomo zanavek meli radi. Morti su ju pogodili selski trači? Ili se nekaj dogodilo kaj ja ne znam?
Trgofka Štefica bolje da si je jezika v rit porinula, a ne kaj si ja ve nek premišljavljem. Znam, ve pazite! Rekel ji bom ovak:
– Ne posljušaj te selske babe. Ti i ja smo sođeni jen drugomu. Naše dete bu rođeno z velike ljubavi. Tvoje. I moje. Predi se bomo zvenčali!
Znam da se bo resplakala od sreče i da mi se bu hitila koli vrata i da bomo išli na spoved i da naš svečenik bodo rekli da je to božja volja.
Idem ve. Smrklo se. Veronika me sigurno čaka. Rekel ji bom da bi dal roku v jogenj da nosi muško. No, meni su i dekljice lepe. Ako bo dekljica, nek ime zebere mama Veronika. Ako bo muško, jeno je sigurno. Zval se bo Gusti.
