Či je naše kral, znači da čovek ima ukusa. Znači da valja!
Zdravo deca i pozdravljeni bili!
Ja sam Vandravec Štef, lojsač, potucalo, landrafjek i još jezero drugih takših stvari. Dravec se takaj pišem, ali me hmanji sosedi odveka zoveju ‘Vandravec’, jer se najrajši tepem seposud, a največ po hižama od sosedi čijih moži ga ne doma. Šalim se, zapraf najvolem lojsati po Međimorjo.
Nemam škole, sem či onu najbitnešu računate: životnu. Nejte mi vervati, tak sam i ja čuda pot čul ljude govoriti, a to vam je velika hurmastoča. Neje dosta sam hodati črez život i sama od sebe bo ti se pamet v glavu nalejala, makar nas je to miljon pot nešči probal uveriti, posebno test ili punica. Kak bilo da bilo, bar čovek dok lojsa okoli more nekaj spametnoga pobrati, ako je malo bole otprti prama sakomu.
Krotka hištorija cajta
Sikak, leta nosiju svoje, pak je tak niti meni več pamet ne kaj je negda bila. Nebrem se to pamtiti polek popisa za kupovino kaj mi ma najdraža Cila zreferera, ovih rati f Izraelu i Ukrajini, jane knige od mega imejoka Štefa Sokolića ilitiga Hovkinga štero čitam na zahodo, cirkvenih zapovedi i sega drugoga kaj si moderni čovek denes mora v glavo narivati. Zato sam si premislil da bi bilo dobro ta moja pametuvaja negdi naškrajbati, a mort i podeliti s kakšom publikom. Ak čitate na zahodo kak i ja, či na za drugo dobro, mort vam bar čreva počistiti ovakši tekst pomore.
Zato se of moj mali kotec (makar sam jo velka svija) zove Zmišljuvač: to nikak ne znači kaj ja tu nekaj zmišljuvlem, nego da je ovo za one šteri se očeju zmisliti nekših starih običaji, reči, praksi, ustvari bilo česa kaj ima veze s kajkafštinom i drugim stvarima povezanima zotom našom domovinom.
‘Zmišljuvač’ vam je prafzapraf međimurska reč za ‘podsjetnik’, bar sam si ja to tak premislil, pak ve vam predlažem. Vidite kak ovi Hrvati imaju one natječaje de se iščeju najbolše friške horvatske reči. To i nam treba! Tak bi, za na primer, Facebook po međimurskim mogel biti ‘Lalofček’. Mislim, od reči do reči to bi bila ‘lična kniga’, a lalovka je po horvatskim ‘čeljust’, ali ne znam za vas, ja prije sega po lalovki nekoga poznam, a to je bitno, ne? Akitak potim Lalofčeku, bar mi muški, največ fajne ženske pogleduvlemo. No, tak se sam meni vidi, mort sam f kmicu vritnul, i ne mislim to onak rasistički, nego preneseno, kak veliju.
Od seposud
Ja vam inače nebrem za sebe reči niti da sam z Čakofca, makar sam se tam rodil, niti da sam z Središća, makar sam tam f školo hodil, niti da sam z Belice, makar sam tam delal, niti pak da sam z Kotoribe, makar sam tam najduže živel. Zato najrajši velim da sam vudreni Međimurec, naturščik z Čakofca. F Čakofco sam ne nigdar živel na paperu, ali to vam je kak naš glavni grad, tak da ga i ovi Međimurci tu okoli doživljavleju kak svojega. Nebrete nam zameriti.
Ovima gori je Slovenija mort bole domača, a onima doli Koprivnica, ali Čakovec je Čakovec. Čakofčancima to mortik malo na jetra ide, slično kak meni žganica, al’ nebreju si pomoći. Jebaj ga, da je grad zaništ, unda bi stvari mort drugač stale, no ve dok je tak, je tak. To so te stare međimurske mudrosti, dok ne znaš kaj bi drugo rekel – ‘Tak je kak je’, ‘Čakovec je Čakovec’, ‘Nigdar ne bilo da ne nekak bilo’, ‘Vlast je vlast’…
Ovu zadnju nam je on Đura fkral vojvodžanski, un Kupojebec ilitiga Balašević. Zato ga voliju tak Međimurci, jer ak je kral, bar je naše kral. Ako vam je ne bilo jasno što so te kaj za Hadeze stalno glasaju, to su oni kaj si slično tak premišljavleju: nek je kral.
Či je naše kral, znači da čovek ima ukusa. Znači da valja!