I tak kak sem rekla, starijapa su postali ‘mamina herbija’. Mi deca pomalji smo se nanji prifčilji i kak sem rekla, makar su melji svoje mušice v glavi. V goricaj v Orešcu i Ropačaj smo nabralji grozdja i nastalo je dvesto i pedeset ljitri vina. Fanj, kaj ne?
To je bilo starijapino blago, jer ne kaj bi bilji pijanec, elj nesu bilji niti dalko od toga. Baš je smešno kak su se f pelnici obračalji, kak nedoklana kokoš, kam ve toga lagva namestiti. Merilji su z japinem cimermanskem metrom i v batovi čižmaj koračalji malo sim, pak malo tam.
Sestre i ja smo sedelje na gornji štengi, a starijapa su v lagef gledeli kak v kakvo božanstvo. Najempot su se zaderalji:
– Jano! Hodi sim!
– Kaj pak ve očete? – rekla je moja mama i došla gljet kaj očeju.
– Jano, ve si z pelnice zemi se kaj ti je treba za tjeden dni, kaj pelnicu zakljenem.
Mama ji je gljedela i neje veruvala kaj je čula. Poštivala ji je, elj je ne dala kaj starijapa gazduvalji.
– Ja imam v pelnici repu, kalampera, zelje, mrkvu, petrožila, štublje za mljeko. Zato nabo ništo pelnicu zakljepal, ste me razmelji? Vi imate samo lagva, i ako Vam se ne vidi kaj je pelnica otkljenjena, morete ga otkoturati kam gord očete, ste me razmelji?
NIKOMU NE TREBA VERUVATI
– Nikomu ne treba veruvati. Baš nikomu! Starijapa su si mondalji par dni, a unda su lagva otkoturalji k pajdašu Jezeriju. Tam su celu zimu vino pomalji spijavalji. Na protuljetje, dok je okrepu trebalo zeti na polje, vina je sfaljilo, pak je bila dobra i zdenčeva voda.
Japa je na ljeta imel čire na želocu. Jenoga je dneva do kraja zbetežal i hmrl. Bilje su mu pedeset i štiri ljete. Poslje sprevoda, v naši su se hiži zišla japina brača Ivan, Joži, Forjan i Kata, kaj se dogovore kaj bo dalje starijapom. Bilo njim je špajsno kaj su starijapa pri hiži, v koji je i sam pokojni japa bil zet.
– Ja od ove hiže nejdem – reklji su starijapa.
– Unda je treba Jani nekaj dati od herbije – složila su se sa brača i jen drugomu pokljimali.
Opal je dogovor kaj mama Jana, poslje starijapine smrti dobi šesto kvadrati zemlje na Gornjem polju.
– Ja očem kaj se to dene na paper – rekla je mama.
– Dej, Jano . oglasil se Joži – pak smo ne cigani!
I tak je mama veruvala v poštenje i držala ji za reč. Jape je ne bilo i teško smo živelji. Stareša brača moralji su iti za težake i nekaj k hiži prisljužiti. Nakon još deset ljet skupnoga življenja, starijapa su zdehnolji.
Na protuljetje je mama štela zasejati obečanu herbiju, ali ju je več Joži zasejal. Ono kaj su obečala japina brača, več je ne bila istina. Samo je Joži rekel:
– Pak ti v reči veruješ? Reči su veter, Jano!
Tak je za deset ljet brige o starijapi, mama ne dobila niti pišljivoga boba. Elj sakoga Bog naplača, pak je i Jožija. Prvo se probal obesiti, ali su ga spasilji. Skončal je življenje kaj si je jenoga dneva z nožom vun creva pustil.
>>> TETA LIZA Legenda i čuvarica izvorne međimurske pjesme
>>> ŽIVOT TETE LIZE (2) Nečem hmrti na kvartelju
>>> ŽIVOT TETE LIZE (3) Dvesto zlatarski čoni
>>> ŽIVOT TETE LIZE (4) Gospodine, molim dinar
>>> ŽIVOT TETE LIZE (5) Pjesma svakodnevnog življenja
>>> ŽIVOT TETE LIZE (6) Nečem nikakvu pevačicu!
>>> ŽIVOT TETE LIZE (7) Dravski vodenjaki
>>> ŽIVOT TETE LIZE (8) Svati bodo na Valentinovo!
>>> ŽIVOT TETE LIZE (9) Veseli svati se nedaju dimo
>>> ŽIVOT TETE LIZE (10) Materina molba
>>> ŽIVOT TETE LIZE (11) Starijapa Joži – mamina herbija