Prešlje su tri ljete našega braka, a Viktor i ja smo se postiha počelji pitati zakaj nemremo meti decu. Zeli smo se z ljubavi i planerali naši deci stvoriti toploga doma. Mam kak smo se doselili na Toplekovo, a Viktor se zaposlil na Veterinarski stanici, znali smo da imamo kakvu takvu sigurnost. Nekoje moje pajdašice več su mele i drugo dete, a nas su pitali… kaj čakate?
Nakon pet ljet skupnoga življenja otprajla sem se k doktoru f Čakovec, a unda i ginekologu f Koprivnicu. Obedva su mi rekli da imam slabo rezvitu maternicu i da se to za koje leto more poprajti. Ovak sem bila čisto zdrava.
Misli su me v noči znale odnesti v roditeljsku hižu, de nas je bilo se pono. Žene su negda domaj rodilje i ako je koje dete hmrlo… Bog ga je zel k sebi i nikomu nikaj, bo drugo. Dok se rodil moj najmlajši brat Drago, mama je, sa zmočena od devetoga poroda i tuljko dece, sklopila roke i prosila Božeka:
– Dej, Božek dragi, kaj moje deklje nigdar nadu melje decu, kaj se nado močilje kak se ja močim.
Kaj nas je mama vrekla, mislila sem si dok smo se Viktor i ja spominali kak bi zgljedala naša deca. Istina, mama mi je navek bila na pameti f takvi časi. Sestra Franca je bila betežljiva i več v leti si je zela starešega čoveka. Eva isto tak. Ja sem ne mogla roditi, a najstareši sestri Kati, mali se dečec ftopil. E, mama, mama…
MALI DRAGEC
Viktorove sestre Magda i Jelka, prefzapraf su zamoš išle isti den. Kak sem več bila rekla, Jelka je odišla od hiže, a Magda i njezin mož Mijo, ostali su živeti z mamom. Tak smo bili jeno vreme si na istem gruntu. Oni su bili napri v hiži z mamom, a mi odzaj v hižici koju smo si vredili štale.
Dok je Jelka rodila svoje prvo dete, Drageca, odselili su se v podravsko mesto Glogovec, kaj njim bo bliže f Koprivnicu na posel. Potlji su naprajli hižu v Koprivnici, a i rodil njim se mlajši sin Zlatko. No, Mijo je ne bil baš dober mož i japa, pak je cela familija poljek njega patila.
Dok je Dragec naveršil sedem ljet, jelka je prosila mamu kaj bu Dragec pri nas i kaj v Dobravi krene f školu.
Tak su Drageca doseljilji. Za ljeto dni smo se Viktor i ja počelji dogovarjati kaj Drageca posvojimo. Bil je dober i spameten. Jako smo ga meli radi. Poljek toga, sestrin mož Mijo je silo delal kaj dete, ako očemo, pripišemo na nas. Misljil je samo na herbiju, a niti jenoga časa mu je ne došlo do svesti, da nam prafzapraf, davlje svoje dete. Dok je Dragec krenul v drugi razred, jenoga dneva nam je njegof jotec Mijo, nahrupil na vrata.
– Ga bote posvojilji ili ga otpeljam dimo?
– On je več kak naš – rekla sem. Ako bo i dalje tak dober kak do ve, ga bomo i črno na belo posvojilji. Viktor se komaj zaposljil, hižu smo nakanilji delati…
– Vidim ja da nikaj na s toga na brzo. Otpeljal ga bom dimo – zdigel je glasa.
Dok je z japom moral iti dimo, dečec je jako počel bečati i prijel se za mene. Nekak mi je prirasel srcu i znala sem da se ovo nabo dobro zaveršilo. Mijo je najmenje misljil na svoje dete.
– Vujnica Liza, nedaj me! Ja očem ostati tu! Vujnica!
Prijela sem ga jako i obedva smo se bečalji kak dešč. Zanje kaj sem vidla bile su njegve sozne joči. F hiži je postalo tožno bez njega, se prazno. Ne nam se vrnul nigdar.
TAK VALJDA MORA BITI
Dragec nam je dišel, živel je kak je živel svojom familijom. Moglo mu je biti bolje, bar v detinjstvu. Sudbina je drugač štela.
Dok je zrasel, zesnuval je svoju familiju f podravskem Svetem Petru…
Vreme svoje dela. I daljina. Moram reči, zadnji pot sem ga vidla, pa jega tomu, tridesti ljet.
>>> TETA LIZA Legenda i čuvarica izvorne međimurske pjesme
>>> ŽIVOT TETE LIZE (2) Nečem hmrti na kvartelju
>>> ŽIVOT TETE LIZE (3) Dvesto zlatarski čoni
>>> ŽIVOT TETE LIZE (4) Gospodine, molim dinar
>>> ŽIVOT TETE LIZE (5) Pjesma svakodnevnog življenja
>>> ŽIVOT TETE LIZE (6) Nečem nikakvu pevačicu!
>>> ŽIVOT TETE LIZE (7) Dravski vodenjaki
>>> ŽIVOT TETE LIZE (8) Svati bodo na Valentinovo!
>>> ŽIVOT TETE LIZE (9) Veseli svati se nedaju dimo