Sam Bog, kaj je prisosedi Jani, dok smo čakali kaj nam zgata šalice, nekaj zružilo. Nesem ja coprnjak, ali navek velim da se ima svoje vreme.
Čaša i šalica su pale stola. Čaša se potrla, šalica ne.
– Kaj je to bilo? – si tri smo se pogledali, bledi kak krpe.
Kaj nekak spuntam sosedu Janu od gatanja, prijel sem se za glavu:
– Su ne to sosed Franc vam nekaj šteli reči, poručiti, soseda Jana? Morti kaj nate gatali, jer bi nekaj strašno v sosu mogli videti? Morti njim falite, pak…
– Pusti mojega Franca na miru!
Bar, bar da mu je tam gori božji mir bez mene. Am ti pokojni na zemlju vide samo lepe stvari, one kaj ne treba, ne vidiju. Tak mi je rekla jena moja pajdašica dok smo se kopali v Zalakarošu. Dej zemi to šalicu s poda – pokazala je na Iveka, no Ivek se zatrdel od straha.
– To je njegva šalica, kkaj bi ju ja diral. Nek si ju sam zeme – zamucal je i pokazal na mene.
– Stvarno, jesi strahopezdec, kaj ti more jena šalica? – sosedu Janu su se prijele one reči da bi sosed Franc mogli po nju dojti. A ne si je stara štela prste smakati, a…a.
Zato je i pogledala mene, istina, šalica je bila moja.
Bormeš i ja sem bil straho ju prijeti v roku. Kaj ako su stvarno sosed Franc na nebu si mislili, koj prvi dotekne šalicu, toga si bum zel k sebi? Jajsiga meni…
Da znate, kaj stvar bu strašneša, vuni je počel dešč jako copotiti i to mi je nekak bil jako hudi znak.
Unda sem se zmislil svojega Japice Gustija, koji bi si za dežđa donesli litra, seli v zapeček v škednju i receterali gosaku Gustiju stare selske pesmice.
Jako sem se nasmejal jempot baš dok sem imel oko deset let, a oni su gosaka Gustija za vrat prijeli i rekli mu:
Dešč curi, staru babu rit boli. Stara baba ne več mala, na debelu rit je pala!
A unda su se smejali kak nori, a gosak je preštimano vrata restegnul, sikak je bil zadovoljen kaj su japica veseli.
A unda sem se stepel jer su soseda Jana pograbili šalicu i deli ju na stol. I Iveku i meni je odlehnulo.
– No stvarno ste kuražni dečki, saka čast. Ve ako mi se kaj pripeti, obedva bote krivi. Bote me nosili na duši do kraja života.
Ivek se naprajil kak svetec, tobož mu je bilo žal, a v sebi si je mislil… samo nek si ti stara šalicu nazaj dela na stol. Ja sem pogledal vun, nekak me struja prešla od glave do pete. Sigurno tam gori, vu oblaki nešto to lepo stvari nameče na svoje mesto. Unda sem si pak mislil, da je potem, moj Japica Gusti bi sto put dobili po ščepci. Jaj kaj su oni se znali fino, kak po loju zgovarjati, majko moja draga…
Zmislili su nekaj za saku selsku dovicu. Oni su najbolje v selu znali, kak da vam to rečem kaj bote razmeli, što se s kem v selu kurva. Kurveraj je bila glavna njihova govorancija dok su se spominali sami sebom, pijani več, a gosak Gusti si je glavu zasuknul pod pero i dremal. Brzo su zaspali i japica, a Gusti njim je bil kak živi vanjkuš.
No, da se nazaj spustim na zemlju… Ivek je pregovoril…
– Kak nam bogobojažljivi, ako sem si još ne žganicu spil. Ova flašica na stolu je već jenu vuru samo kak ukras. Bi se vam, soseda Jana, lepo vidlo da vam nešto, dok kopate vrta po vrućini, da tri kapi vode na listu kelja?
– Naj biti bezobrazen – pogledal sem ga jako strogo, em bi si stvarno za čašicu rakije i gače prodal.
Pravzaprav i moj japica Gusti su bili takvi. Oni su bar se celi den nadelali kak crf, a of šlajfarek samo okolo štrpče, de se kaj bedastoga događa, eto njega. E, takof je on. Trebalo bi ga malo stegnuti.
Se se bojim da je morti po selu prepovedal da sem spal z časnom. Z druge strane si mislim, več bi soseda Jana doznali da je žlabral gluposti. Bil je strahu kaj nešto i vugurka na dnevni red ne dene. Bog me oslobodi ako ga del v zimnicu. Ne, ne, nabo on mene videl pri njemu deti si v zobe, ama niti jabuku, kamoli kiseloga vugurka. A hrani jenoga prasca, bliže Božiču bo sigurno dvesto pedeset kilaš. Priprajil bu kolinje.
Najepot je soseda Jana glasno rekla.
– Prešla me volja za gatanjem, idem donesti malo rakijice. I meni je v žaloco nekak ne dobro. I več mi nigdar naj reči za mojega moža. Tam de je je, nek mu je božji mir. Si me razmel? – vuprela je prsta v mene
– Soseda Jana, am su to selske maringe, to sem morti potegel od mojega japice Gustija. Znate dobro kakof su bili zajebant.
– Ajde dobro, počakajte malo, pak bo razlaz. Moram peglati veša. Takvo dežđevno vreme mi dojde kak naručeno za takve posle po hiži.
Odišla je v ganjk, jer joj se tam otpiraju špajzova vrata. Ja sem pogledal v oblok, se se zlevalo. Kaj ve Božek moj, moj japica delaju na nebu? Je gosak Gusti ž njimi ili jega raja i za živinu? Što bi ga znal. Jako me zbesila ova šalica koja je pala stola. Jempot su japica rekli, ako treba z neba opomenuti, došel bu nekof znak…
I kaj je ne?
Najempot se čulo … buuum !
I Ivek i ja smo skočili i otpreli kuhinjska vrata jer smo znali da je ve nekaj znapak. Soseda Jana je sedela nasred ganjka i v zraku deržala flašicu z rakijom. Ivek ji je flašicu spuknul, kaj se na potrla i odbežal ju je deti na stol.
– Primite me, pomorite mi kaj se stanem… – skečala je soseda Jana.
– Jajsiga meni, imel si ti, purger praf, to mi moj pošilja z neba nekvoga znaka. Valjda nabo došel po mene? Takof znak mi od njega zapraf ne treba. Nek si počiva v miru. Kaj ve oče? Poškljiznula sem se i gle ve… – soze je spustila
– Ma nikaj, soseda Jana, ma šalica je pala stola jer ste ju preveč deli na rub –
Zdigli smo ju, ali je lepo rekla nek se poberemo dimo. Smestili smo ju na kauč, Ivek si je popojdoč par pot potegel z flašice i sosedu Jano smo lepo pozdravili i pustili ju kaj si počine.
Ja sem došel dimo i isto tak si legel i poslušal radija i dežđa. Unda su bile vesti. Sem dobro čul? Kaj nega gomba na radiju kaj mogel pritisnuti i kaj spiker ponovil dva put kaj je rekel. A mislim da sem čul…
… osim poplava možemo reći da je i potres malo uzdrmao žitelje Koprivnice i donjomeđimurskog kraja… – rekel je spiker
– Hahahaha, japica Gusti, dober je strah komu ga Bog dal !
Ali meni je bolja ona vaša starinska… dešč curi, staru babu rit boli…
