Ivek je mislil da se ve celo selo spomina za njegvo meštriju, nakon našega neslavnoga kopanja.
Ako vam rečem da se baš ništo, ama baš ništo ne ogljedal na njega, a kamoli pogledal v njegve gače, nate verovali. A dok se motal oko sosede Jane, ona je bila alfa i omega salom, ceckima, korpom i se kaj je štrčalo z korpe.
Bogek moj, a kaj je vu vodi drmel dok su ne si dišli dimo, ja sem mu ne kriv. Zval sem ga sto put vun, donesel k vodi velkoga brisača, ali nikaj. Ne si je mogel šenjkati onoga vugurka. Valjda je i senjal da ima tak velkoga i da bi sosedu Janu najrajši resturil ž njim kak narod negda bugarsku skupštinu. A vugurek je potonul na dno. Valjda je ne potlji ronil i našel ga!
Najvažnejše od sega je, kaj vam dam na znanje, da se pak ništo z nikem ne spomina, osim kaj je Veroniku i mene od ljubavi dva dni nakon kopanja boljela saka božja kost. Čak dok sem drugi den skrčil nožnoga palca, zaštrecalo me v križima. To vam je bila prava raspaljotka.
Ne, nesem ja navaljil, nego ona. On špampet od njezini pokojni starci, bokibogme je ve za poprajti. Prva zaklanica bi mogla nekomu glavu priščeknuti . Ali to je ve opče ne važno. Ja vam več nočima ne spim. Veronika i ja smo se ne, kak da vam to objasnim, do unda seksali, razmete? Bilo je tu sega i sačega, ali seksali smo se ne.
Dok je ona na mene splazila sem mislil da me bu strgala kak suhu slamu, kušuvali smo se kaj je se pocalo, ja sem ju pazil kak kap vode na dlanu, a ona me bila željna i taki smo se spljeli i kopitali. Da su moj japica Gusti živi, gosaka Gustija bi sigurno bili napili. Jer, navek su rekli da trezen i pijan nejdu skupa. Mesto kaj obedva bili trezni, oni su za saki vekši svetek i događaj obedva bili pijani. Jer navek su rekli, ti kak si na mater šlampavi, ti boš mam dete naprajil. Joj, to mi je ne bilo ni na kraj pameti da bi ona mogla ostati trudna. Am Veronika je spametna dekla i se bu v redu. Ve je na dva mesece i unda bomo vidli kak i kam dalje.
NEGO…
Močila me druga stvar, a nesem imel koga pitati. Ne! Nabom Iveka zval k sebi i nečem iti k njemu. Sam bom to z Veronikom rešil.
Veronika je ne bila jumferica. To me jako začudilo ili sem ja v naši celi štoriji nekaj prepustil. Jedino more biti dok smo vu vodi bili i stiskali se i brusili jen v drugoga i unda je doletel on dečko z loptom i mene je porinul jen meter dalje.
Ako je negda mela drugoga, nek se izjasni jasno i glasno. Ako je ne, pak se nek izjasni glasno i jasno. Ne, nabom ju ostajil. Nagovoril ju bom kaj se sleče, mislim z časni, kaj se zvenčamo i kaj bomo jena familija. Bodo prešli ta dva meseca i unda bo se rešeno.
Vidim da su se soseda Jana denes hapilji brati grozdje na vrtu i trebal bi njim pomoči. Ž njimi se moči pospominati, ne zdižu paniku, osim kaj imaju jezika kak krava repa. No još sem najgerek elj pem elj nem, jer tam bu i on mali vugurek. Ne bi se čudil da si je vugorka z Drave dimo donesel i del med ostale vugurke i složil za zimnicu. Jenu penziju davljem da je v zimnici. Fuj. Ako ga bom pital bu rekel, pa kaj se ne v Dravi pral bar pet vur? Vražji vam je on.
Zutra bom skočil do sosede Jane, nek ide se k nevolji, jempot mora te srdi biti kraj. A i kaj sem ja kriv kaj su zaspali na soncu i kaj su se spekli? Ivek ji je nametal obloge od jogurta. Bogica moja soseda Jana, sigurno je ne spala celu noć. A dobro, nesem niti ja, jer sem imel vraškoga posla.
Njezina pajdašica Vera, s kojom je hodila v Zalakaroš na bazene dok su bile mlajše je mam drugu jutro v štacunu se zlajala da je Jana kak gola pečena koka v izlogu. Dok se soseda Jana ogulila i dok ju je ne več peklo, v štacunu ji je vrnula milo za drago.
– Kaj Vera oče, bolje da je povedala kak je v Zalakarošu z Janošom potrla kabinu za preslačenje. Meni je bar ništo ne videl golu debelu guzicu i borovu šumicu.. A ona je, nek se i to zna, pokazala ju sem. Dobro kaj se ništo ne ftopil dok je videl. Dok je Ivek došel v štacun, baš dok se to događalo, držal se kak drveni tetec. Glumac vam je on. Glumac. I kak da dojdem na zelenu granu?
SOSEDA JANA, VAM JE TREBA TEŽAK?
– Soseda Jana, dobro jutro – pokočil sem i došel v kuhnju sosede Jane. Ona je baš gledela v šalicu z kavom.
– Dobro jutro, kaj ti je treba – rekla je povređeno
– Soseda Jana… najte se srditi, prosim vas
– Ne srdim se, bila sem betežna, niti si ne došel pitat kak sem.
– Znate…
– Znam, sinek, znam, zateljebal si se kak školarec, a ja sem ve ništo i nikaj. Ona časna sestra ti je pamet zmešala. A muškoga ne bi smela niti pogledati. Spal si pri nje, kaj ne?
– Ma nesem, što vam je to rekel?
– Ne laži, jer ti bom otprela vrata.
– Nesem soseda Jana, Iveka mi živoga svedoka, nesem.
– Iveka, veliš… živoga svedoka?
– Imate malo kave i zame, soseda Jana?
– Imam, a dok ju spiješ bom pogljedala v šalicu elj si zlagal… sedi si.
– A to, ta kava i sos ocpod ne mora biti istina, to je samo tak… za zabavu…, kaj ne?
– Bomo vidli, meni je na dnu šalice navek istina i samo istina.
– I… i..istina i ssammo istina? – počel sem mucati
– E tak, a ve mi lepo prepovedaj kaj si delal ove dneve dok sem se ja gulila kak ofucani maček.
– Je, rečite kaj očete, ali mene je štekala kičma, pomalo su jesenski dnevi. Da me ne Veronika maserala, morti bi i v bolnici zaveršil. Legla si je na mene i ravnala mi hrpta – štel sem se zvleči ako bi soseda Jana kaj v kavi vidla.
– I, ti ga zravnala?
– Komaj, soseda Jana. Komaj. Skoro sem pak ostal invalid.
– Kaj mi naš povedal. Da je ne bilo nje, što zna kaj bi tebe bilo ostalo, kaj ne?
– Dobro jutro – naglo je i Ivek otprel vrata. – Znači tak, bez mene. Idem ja…
– Stani – viknula je soseda Jana – da ja vidim kaj imate v šalici…
