– Ivek, kak Bogeka te prosim naj se srditi. Kuc, kuc, otpri mi vrata, pajdaš. Am naj se srditi!
Ti bi bar to moral razmeti. Pak je ne januar kaj se zmrzel v kuružnjaku bil, a strah te ne kaj te nešto fkral. A i kaj bo s tebom, peneze nemaš, hižu na moru nemaš, dionice nemaš… Ivek!! Pak z Veronikom sem ostal, z Veronikom! Znaš da za njom patim kak suha zemlja za vodom.
>>> STARI DEČKO Ljubi me, Veronika
– Naj mi več hoditi pred vrata, gotovo je. Ve idi k sosedi Jani i mene ostaj na miru. Imaš svoju časnu sestru, ja sem ništo i nikaj. Samo ti lepo ostaj mene na miru. Zgledal si otperto bljuzicu i cecmantljina i ponorel. A ja nek glumim goluba? Ne ne, nigdar več. Gu – gu, gu – gu! Zajebel si se malo! Idi od vrati dok se ne rezmašem. Pak buš unda videl kak se v cirkvi fučka.
– Dobro, Ivek, vidim da si jako se reskuražil i da je to, to.
Morti je i dobro tak. Ak’ se preveč za ljude vežeš, jako i patiš. Zato idem. Donesel sem ti i par košulji koje su mi male, a buš videl, ako ti nado po volji, dej je ciganici dok pe poljek. Majko sveta, skoro mi se flaša poškljiznula. Još bi mi to bilo treba, kaj se potere.
– Kakva flaša? – Ivek se oglasil pomali, kak da hmira
– Am žganica, mama mi ju je z doma poslala, bila strina Jula z Jalžabeta prinji, pak je donesla. Oni imaju jako staru, več ve skoro pet let ne žgeju. V domu, mama veli, nesmeju to meti, nekof red mora biti. A znaš da ja ne pijem.
– Je morti zapisala na flaši kojega je leta? – mam je v Iveku počela delati pajdaška znatiželja, a za deset minut smo već sedeli za kuhinjskim stolom pri flaši z 2008. leta.
– Ivek, puno sem ti toga namislil si reči, ali vidim da si ne baš srečen, ali kak da ti restumačim da bu ve malo drugač.
– Purger, kak drugač? Za koji den časna sestra ti otpotuje, a mi smo pak berajt za ribičiju i još puno posli, pri sosedi Jani imam tri dni drva za cepati. Jesen bu za čas došla. Dobro znaš da smo obedva zmržnjeni v zimi kak vugurki, no ljefko tebi, plinara dela. Ja još v šumu kanim.
– Mene Ivek naj zvati sebom, jer s tebom v šumu nigdar. Još senjam onoga fkrađenoga bora. Več si buš težake našel, am pred štacunom saki den sediju i piju pivu.
Nego, došel sem ti reči još nekaj. Rekla mi je Veronika kaj bi se štela v Dravi kopati kak negda dok smo bili mladi, pak sem te štel prositi, peš z nami. Znaš da je malo haklik kaj pemo sami. Kaj bodo ljudi rekli?
– Zamisli ti ovo, kaj bodo ljudi rekli? Nek rečeju kaj očeju, a pravzaprav niti me ne briga. Ako sem ja mogel štiri vure v koružnjaku skakati kak zajec i glasati se kak posrani golub snočka, a tebe je baš bilo za mene briga, kaj bi ve trebala mene glava boljeti za tebe. Nek rečeju da časna sestra na godišnjem puni baterije, hahaha.
A ve idem k sosedi Jani, ona ima još starešu žganicu. I prosim te, zakljeni mi ulazna vrata dok si namisliš dimo iti. A ključa deni pod srednji teglec z muškatljinom. Bok, stari.
– Ivek?! Čekaj! Ivek!?
– Ovak, da si razjasnimo, idi si ve k časni sestri, ja idem k sosedi Jani. Šljus pateka.
Ivek je odišel tak brzo i pobegaval do ulazni vrat sosede Jane. Kaj pak mu je dospelo?
Nigdar se ne štel kopati, a kak pem sa z Veronikom, nema smisla. Joj kak smo se snočka kušuvali. Ja nju stisnem k zidu, ona mene na drugi zid prek pota. Voski je ganjk, pak smo se navlačili kak da smo malo ne popravem, hahahaha, a z kuružnjaka je moj drug golub gugutal kak da je završil muzičku akademiju. Ne priškodi mu malo kaj bo zapreti v ketrec, oj, majko mila… nedem još dimo, ve ga bom ftruc počakal, kaj bo videl da nemre pol flaše spiti i unda me ostajti na cedilu…
PRI SOSEDI JANI…
– Soseda Jana, dober večer. Najte me tak grdo gledati, am sem snočka bil betežen. Opal sem z lojtre koja pelja na najže. Dok sem išel dolji. Noga mi se posmeknola i samo sem po riti išel… kljap, kljap, kljap, kljap. Poglete kak sem si zdrapal noge…
– Ne zanima me. Kaj veliš? Najže? Jako si se zguljil. Kak da si po koružnjaku goli plazil. Lježi si na postelju kaj te malo z rakijom zmaseram. Norc jen, mogel si se zatoči. Kad ne paziš. Na črevo se obrni… pak si i po hrptu zdrapani…
– Jaj, jaj, i peče me i žegeče, jaj, soseda Jana, vi ste trebali doktorica biti. Najte so rakiju potrošiti… jer se imam nekaj z vami spominati.
– Ve se obrni na hrbet kaj te pocapkam. Pak i koljena su ti zdrapana… dej mi reči, de si stvarno ti snočka bil? Ha? Da čujem!
– V gačaj ti skoro ničega nega. Ivek, pa kaj bomo s tebom?
– Soseda Jana, istinu vam bom rekel. Bil sem na Dravi. Več je bila kmica.
– Za pet ran božji, kaj si delal v noči pri vodi? Nemaš kakve špajsne misli?
– Ve ste i sami rekli. Zabadaf ga probam zdiči, ako se samo frče i frče. I kaj je najhujše, pajdaš Purger me zove na kopanje, a kak se slečem, ha? Bogu za plakati.
– Veliki problem, Ivek.
– A se zmislite, soseda Jana, kak sem vas kresal pred deset let, ha? Kaj smo ne onu postelju staru potrlji?
– Nesmo, to smo još pokojni i ja načeli, a posle je samo deska počila do kraja.
No nema veze, veliš da bi rad se kopal na Dravi? I to po dnevu? Kaj da zmislimo? Imaš jako čvrste kupače gače?
– Imam, soseda Jana, znate one plave koje si v žimi oblečem pod doge gače, i unda još one zimske hlače pod radničke hlače.
– Joj, pamet mi bote, vi stari dečki zmešali. Znam kaj bomo naprajli.
– Kaj, soseda Jana?
– Da peš na kopanje? Zutra?
– Je. Ako bo tak vroče, zutra.
– Ja se bom rano stala i nabrala vugurke. Ti v jutro dok peš po kruha, a moreš i meni jenoga zeti, navrni se sim. Tu si zebereš jenoga vugurka i sprobamo kak ti v gačaj stoji. Zeberemo deblješega, zafrknjenoga, a unda moreš med kopači biti glavni. Ako ti se koja počne šmajhati, paazi kaj te nej za njega prijela. Unda si gotov.
– Soseda Jana, vi ste spametna žena. Znate, vugurek nek bo po meri, ne mora biti jako velki, onak, kaj ja znam, bote več smerili od oka. A morete smeriti i koj vam paše.
– Nesramni bil, idi dimo. Zutra pred kopanje bomo ga sprobali. Donesi si i kupače gače…
