Izbori su za nami. Ja, Zvjezdan Međimurski obavil sem se po svoji savjesti i dobri volji. Zaokružil sem mlade ljude, to jedino morem reči.
Iveka sem počakal kak smo se poškomač dogovorili. Prek pota stare škole, v birtiji. Soseda Jana je išla na glasanje i obračala se oko sebe, a mi smo več na veliko vodili muške razgovore. Fkanili smo ju za pol vure. Došli smo na glasanje v sedem, a ne v pol osem kak je soseda Jana rekla. Smrknula se, zglasala i brzo odgalajzala k meši. Znali smo da bomo posljušali radi toga, ali nabo nam niti prvi niti zadnji pot.
Mi smo v birtiji jen v drugoga gledeli ozbiljni kak nigdar.
Ivek i ja smo meli dva velke, velke probleme. Jen problem se zval – Veronika, to je bil moj problem, a drugi – toplice. To je bil problem mojega pajdaša. Ve vam sigurno nikaj ne jasno. Trebalo se sleči v kupače. Razmete? Pak, da vam se po redu pojasnim.
Pri sosedi Jani smo ne bili tjeden dni. Od izbori.
Muški problemi nek ostaneju muški i to je to, rekel mi je Ivek. Ja idemo dok se smrkne pod Veronikin oblok. Ivek pe z menom. Ako se još navek z črešnje vidi v njezino zadnju hižu de spi, bom ji fučnul.
Ivek bu pazil stražu. Kaj kakvi fakinu ne prejdeju po vulici i ne prepane nam plan. Kupil sem rižinu čokoladu, a ružu bom ftrgel v parku. Dok Veronika skuži da sem to ja, mislim da se bo prvo zbesila kaj je ne kakof lopov, a dok me zgljeda, sreči nabo kraja.
Ivekof problem se tiče, kak da vam pojasnim, njegove muške časti. A dobro znate kaj je muška čast. Dok imaš kaj ženski pokazati dok se slečeš. To je muška čast. Ali kaj je, tu je. Ivekova muška čast je bila kak pol hrenovke. Ne, neje mi pokazal, soseda Jana mi je povedala. Ja sem si ga nakon toga smeril na hrenovku. Jako sem bil zadovoljen. Tri frtalja hrenovke i još malo. E, to je bila moja muška veličina. I hrenovka je puno tenša od moje muškosti. Znači, morem se sleči v toplicaj i šepuriti kak puran.
Ne, nesem ja takof. Ivek je moj pajdaš i treba mu pomoći. Njemu su kapnolje dve soze. Isuse, pak Ivek jako pati radi toga.
To je bilo onoga dneva dok su bili izbori. A kak je Bog predi sebi bradu stvoril, tak smo prvo rešavali moje probleme, otprajli smo se do Veronikine hiže.
V njezini hiži se svetilo. Nesmo išli čez potna vrata nego čez sosedov grunt. Već dve lete su prešle kak ništo tu ne živi, ne zmislim se kak se žena zvala. Am su mi mamica rekli da je išla v pelnicu po kosanu mašču, pak si je koka potrla. Ve je pri čeri, v Belovaru. Šuljamo se mi i prešli smo prek plota.
– Ivek, si tu? – šeptal sem
– Tu sem, tu, samo sem si hlače zadel na nekof koljič.
– Ajde kaj se dogovorimo. Ti splaziš na črešnju jer si mali i dobro pogledaš čez oblok nuter. Ako je Veronika domaj i ako je sama, spustiš se doli i ja idem gori. Ja bum ostal na črešnji makar celu noč, se dok se svetla ne pogasiju. Očem ju gledeti, gledeti i samo gledeti. A zutra zemem poklona i idem direktno na njezina vrata.
– A moj problem? – cvilil je Ivek i probal se prijeti za črešnju poprek.
– Se bumo rešili. Ajde stani mi na pleča i gori si.
– Črešnje su zrele! Kak su debele! Zvezde z nebesa. To ti je ono volovsko joko, tak se te črešnje zovu – Ivek je dosigal prvu rodnu granu.
– Pusti ve črešnje, je Veronika nutri? Ivek??
– No kaj si dosaden, očeš kaj se z črešnjom zagotim?
– Ja te bom zagotil dok doli dojdeš. Morem se zakljeti v pokojnoga japicu i njihovoga gosaka. Prisele ti bodo črešnje zanavek.
– No kaj se peniš? Veronika klječi i moli.
– Hodi doli, inače nabomo tvojega problema rešavali. I ne fljučkaj mi koščice po glavi.
– Uh, kak su fine – te bedak je mislil na črešnje, a ja sem bil na galgama. Skočil je doli.
– Aj ve mi drži lojtricu kaj ja splazim – rekel sem.
Ali nikaj s toga.
Malo dalje bil je jen stari štokerljin i postiha sem ga zel. Skočil sem na prvu debelu granu. Si sveci i anđeli nebeski!
Veronika je bila v beli potkošulji. Sedela je pred zercalom i česala se. Majkica moja sveta, Bogek dragi, pomorite mi. Rečite mi, dejte mi znak da me moja draga ima još rada! Dejte mi znak bilo kakof.
Kajpak i dal mi je Bogek znaka. Of mulec je splazil na kuružnjak, na gornju gredu kaj pobere jenu jako rodnu granu. I na jemput:
Buuum! Čez gornja vrata je opal v kuružnjak. Ja stvarno nemam reči kak da vam to sprepovedam. Nemam reči niti jene jedine.
– Ivek, si tu? Iveek?? – zval sem ga postiha
– Tu sem. Jaaaj! Nikaj mi je ne, samo sem se jako zbesil. Pomori mi. Noge mi drfčeju. Zamisli da su v kuružnjaku bile zobače, rasuhe, lopate, pak da sem opal na nje, mam bi bil hmrl! Jaaaj! Samo kaj dojdem k sebi.
Skočil sem doli z črešnje i vutom toga su se otprela Veronikina ulazna vrata.
– Tko je to? – oglasila se Veronika
Ivek se pritajil kak da ga nega, a ja sem koračil bliže.
– Ja sem, Veronika.
Nesem se nadjal niti vu snu. Veronika je poletela čež štenjge k meni i obesila mi se oko vrata. Kaj sem mogel? Tak sem ju jako stisnul k sebi, pa nek ve bo kaj bo. Počeli smo se kušuvati. Ovoga sem se ne nadjal. Prijela me za roku i potegla v ganjk. Naslonil sem ju na zid i ona je nad svojom glavom vgasila svetlo.
– Guuu, guuu – čulo se z kuružnjaka. Ivek se pretvoril v goluba. Daval mi je znaka.
– Što se to čuje? – pitala je moja draga z mladosti, nesuđena moja, ljubav moja
– Ma nekof golob se v kuružnjak zaletel, pak je zgleda opal nuter – rekel sem
– Dok sem išel sim, čul sem kak lepeče s krilima.
– Da, golubovi su se uvijek zadržavali na gredi jer je bilo kukuruza. Očito neki dugo nije bio kod nas. Volim golubove, Ivek. Trebao bi ga osloboditi i pustiti na slobodu.
– A ne, Veronika, mogao bi u tami stradati, neka ostane unutra do jutra. Pusti ga neka guguče. Ljubi me kao nekada… – i ja sem se hitil malo v zagrebaćki štih. Pak sem ju stisnul k sebi i jako kušnul.
Tak smo se ljubili dobre tri vure.
– Moraš sada poći. Vidjet ćemo se. Ostajem još dva tjedna.
Steška sem se otprajil dimo. Dok sem išel kre kuružnjaka, goluba je več ne bilo nutri. Valjda je odletel.