Prvi maj, Prvi maj! Negda, to je bil jako velki svetek. Po seju zemljami, tak i prinas. Znam da sem z tatekom, Zagreba, dohađal na pravi radnički grah. Mama se sa ta leta napuhavala na mamicu Janu kaj sem herb hiže ja, a ne ona, rođena čer. Ja sem bil mali, meni je bilo važno kaj bom videl japicu Gusteka i gosaka Gusteka. Kaj mi japica sprepovedaju pak nekvu priču, jer oni su vam, znate, bili svecki kočijaš.
Negda dok je mene još ne bilo na svetu, svojemi koli i žrepcom Sokolom švercali su v grad rakiju i graha, kosanu mašču i domače platno, tijam do Varaždina. Popojdoč su prodali i šlape i cekere od šemetinja. To je bil glavni posel babama v zimsko doba. Plele su kite, pak z kiti cekere, požvepljale i tak to… moralo se nekak preživeti. Za gradske frajere su takvi šlapi bili … dušu dalo. Topli i mefki, jer živeti v stanu je bilo za gospodu namenjeno.
I trači, dok su saku večer šemetinje zbiralje, e to je ne bilo čega je ne bilo.
Što je koga i što bo koga skrivečki fčehnul. Moja mamica su rekli da je v sakem seli več fačuki nek prvomajskoga graha, toga se dobro zmislim. A kaj bomo, krv je bogme ne voda. Rečem vam zaiskreno za mojega pajdaša Iveka, samo najte širiti dalje. Jer to je ne ništo znal osim moje mamice i samo njezine štiri pajdašice. Jena od nji, Ruža, ona je bila sestra od bandista Slaveka. Ruža je bila živi svedok da je njezin rođeni brat Slavek, fčehnul Ivekovu mamu Getu na parmi, dok su njim roditelji bili na Mariji Bistrici.
Ruža ji je bila pajdašica i za dva mesece je čula da Geta ide zamoš. E, ne za brata ji Slaveka, najte misliti. Bila je sneha pri staremu pokopiču. Starci su mu pomrlji dok je bil jako mladi, ta prefriganka se celi život, vroča ne zdene vode napila.
Dok se Ivek rodil, pokopič se pomladil i si su rekli da jamu skopa dvaput brže nego je do unda. A bandist Slavek je bil tak mali, frčen, baš kak Ivek. Ma kajbi pokopič kaj posumljal, on je samo posljušal da bo zazvonilo na molitve i kaj si zeme štihanjku i lopatu. Imel bi vam o tomu puno reči, ali ve me srce boli, prvi maj je tu. I moja Veronika, kaj bom ž njom? Za jen Prvi maj smo se f kmici f parku kušuvalji. Dišala je na hrgovan i protuletje.
Zastave su bile seposot, žene v nošnjaj plesale, muški se napili, pesma, pijača, grah, pajcek na ražnju i selo je bilo veselo. Dobro kaj su drugi den domaj prdeli, jer grah svoje dela, to znate i sami.
No moram reči i to. Pijanci su vam zaistinu kak norci. Smejalji su se Žuškinomu Lojzu, koj je navek zmislil pesmu na drugu ariju. Ali, reči su bile iste. – Došel nam je prvi maj, se su selske k…. fraj – a kaj bote z bedakom. Ništo od njihove hiže je ne imel tri čiste v glavi. Znam dobro jer njim je hiža bila kre Veronikine hiže.
Moram nabrati vupača, jer pem do nje jenu večer. Nabom hmanji, ali bom ošter kak sablja. Ima da mi reče istinu i samo istinu. Ako me ne mela rada, moje joči ju več videti nečeju. A ako me mela, zakaj je odišla? No moram najti Iveka kaj se predi dogovorimo kaj nek se rečem i kaj pe z menom do njezinoga grunta. Je, i kaj ne pove sosedi Jani kaj kanim iti. Dva prvi maji su za moje žifce i za moje srce preveč.
No ve se idem malo prepeljam po selu. Ivek sigurno zna de se se grah bo šlaprčkal. A unda makar dojdemo k meni i vužgi po črnjaku.
