Ako sem ikad imel sreču, unda je to bilo baš to večer dok se soseda Jana naglo podela v našem ganjku. Nega te brzine s kojom je moj mozek počel kurbljati i zmišljuvati kaj nek rečem sosedi Jani, kaj ne korači v prvu hižu de je moja mati.
Znam da je soseda Jana v njihovi mladosti nekaj frfljala oko Iveka. I moja mati je patila za njim. I unda, kak je jempot rekla moja mama, si su znapak zišli i ništo je ne završil z nikim. Život njim je zabezeceral druge pote.
Mama Štefica je prisegnola da bo sosedu Janu, ako ju sretne, spotrla kak staru kantu. Ne! Sosedu Janu moram sprajti nekak z ganjka! Predi nek bo kesno.
Se je to meni jasno osim jene stvari. Kaj su itak vidle vu tem škorjancu, tračljivem kak baba i žmefkem kak pokojni gosak moje pokojne mamice Rege?
Gosak Gusti je bar imel po štiri prste mašče pri riti. A kaj ima Ivek? Dok sem ga nesel pinčeke lončeke z borove šume kam me namrduljil iti po bora, nadigel sem ga kaj mi se na posmeknul i prijel za prazne hlače na riti kaj sem se zbesil.
Je, kaj nam zabil. Gosak Gustek je dobil ime po japici Gusteku koji su se gegali i trezni i pijani. Doktor njim je rekel da njim je desna noga malo krajša, što zna od čega njim je tak došlo. Mamica Rega dok se resrdila njim je vikala da bi bilo bolje da njim je krajša desna roka, i kaj čašu ž njom ne bi mogli doseči.
Dok su japica hmirali deli su roke skupa kak da moliju Boga. Mamica Rega je mislila da ji očeju nekaj važnoga na kraju ovozemaljskoga života reči, pak su se japici smilovali. A japica su stvarno imeli zadnju želju. Mamica su prislonili vuho na njihove vusnice, a japica su tiho i zadnjom snagom rekli … prosim gemišta!
Gosak Gustek je poživel još tri mesece. A unda su ga mamica našli crknjenoga na starem divanu v škednju. Tu su navek japica v leti spali, dok su se vrnuli z krčme. Gosak Gusti je v kmici ostajil goske v kocu i skočil je na divan do japičini nogi.
Kaj na se to reči?
Takva njim je bila sudbina. Jedino kaj su japica imeli pravoga sprevoda, a gosaka Gusteka su mamica crknjenoga poparili, opipljali i prodali na pijacu.
No, stepel sem se i soseda Jana je i dalje držala tenjera s kolači.
– Čuješ ti mene, kaj si zamrel?
– Skoro soseda Jana, skoro. Se sem zvun sebe. Znate, mama je povračala celo popolne i tlak i glava i želodec, se ju moči. Nejte prosim vas dalje, kaj se ne zbudi. Ne znam kaj pak ji je ve dospelo.
– Sirotica, navek je i bila sa nikva, neje niti čudo kaj se i te let ščakala. Dojdem v jutro? Pak ako je tak hitvalna, kaj se nej kaj črnoga dogodilo. Bogica, štela bi ju sikak videti. Viš kak je život čuden. Denes si je, zutra ga te več nega. Idem unda, naj zameriti kaj sem tak znagla došla. Kak da sem znala da je nekaj ne v redu – prijela me za laket i ja sem pak dobil krila. Nesem vupal preveč, ali kak sem stal iza nje, prste sem porinol pod njezine roke i zgrabil ju za… četvorku.
Zel sem tenjera i del ga na ormarić za cipele. Obečal sem ji da se bom sikak v jutro na pet minut navrnul.
Od radosti kaj bum došel, zabila je tenjera z kolači. Požurila se v kmicu.
Uh, za dlaku, za dlaku su se skoro srele.
– Sineeek, pa de si? Što je to?
– Ništo mama, ništo, nekvi dva pesi se parijo, pak su došli v dvorišče. Pustil sem njis na vulicu.
– Več sem mislila da bi lefko ova naša soseda polovnjača vupala me dojti glet. Osim kaj peče dobre kolače i pri meši falša, drugo niš ne zna. I muški. E za to je kak rođena. Ali dobro je ako veliš, da je dosti oslabela. Dej mi ve lavura kaj si bom malo noge namakala. Sneg bi još znal zapasti. I zakleni ulazna vrata…
Tak je, za pol vure, mama zaspala. Ja sem si stolčeka del v ganjk i v kmici vam jem kolače. Zdigani z makom i orehi, nega boljega.
Premišljavam si. Postal sem nori čovek. Samo mi je seks na pameti. Sram me reči, elj ve da je mama ne domaj, zapamtila bi soseda Jana da je zadnji pot trla orehe. Kaj me briga kaj bo ova cvilidreta Ivek lampal po selu. Njemu vam več ništo ne veruje.
Otkad mu je v gačama propuh, pri ženama je postal tehnološki višak. A kak su se većinom mladi dečki odselili, mi malo stareši tu i tam imamo sreću.
A kaj da vam velim, politika je takva. Ako nega mladi, vudri po penzionerima. Jedino kaj tu ne trebaju poticaji. Samo kolači z orehi. I malo sreče.