– Sto kuna si dal svečeniku? Ti si ne pravi! – vikala je moja mama Štefica dok sem ji prepovedal da sem svečenika lepo dočakal, kak se i fšika. To su me nafčili moja pokojna mamica Rega, Bog njim dušu zveliči, tam de si ve počivaju. V raju, tam su moja mamica Rega.
A mama je, z Doma umirovljenika po Božiču nakon dogo let, došla malo v svoju rodnu hižu. Rekla je da nabo nigdar več došla, makar si pokrepali.
– Mama, mama draga i premila, pak hižu moramo svetiti za saki Božič, itak je ve to moj dom… – Tvoj dom, tvoj dom, prafzapraf si mi ga, kak bi rekla, od mamice fkral. Stara je ne znala kaj dela i prepisala je grunta i hižu na tebe. To ti jedino morem reči. Stara smuklja prefrigana.
– Mama… – počel sem pogatati reči… – Ovak, da se razmemo – zaviknula je mama. – Baš me briga komu je ta stara veštica zapisala, ionak mi je ve sejeno. Nego, ti mi još reči, su svečenik pitali za mene?
– Pitali nego kaj? Još i kak pitali! – zlagal sem od šuba kaj se se zdimilo. – Kaj su pitali? Dal’ smo si kaj prišparali v Zagrebu? A kaj bi drugo pop pital nego to? Ili morti dal’ sem si našla kakvoga bogatoga v Domu?
– Ne, mama, pitali su jako lepo za tebe. Da li se dobro brigaju za tebe, kak ti je zdraviče, da li ti kaj ostane od penzije …
– E, tu sem te čakala! Kaj njega briga za moju penziju i kaj mi ostane? Sigurno da mi ostane i to je na sigurnem. Njegova škrebljica njegva briga, moja škrebljica moja briga. Si videl prefriganca… nesi mu smel dati sto kuna i amen – srdila se
Ve pak sem se ja resrdil i zdignol glasa. – Naj ti mene vučiti kulko vredi meni moja hižička! Ako treba nek ju poškrope deset pot, deset pot platim isto.
A ve bi si mogla malo prileči… serije ne pratiš?
– Sama kurvarija, nikaj ja ne pratim, nego… štela sem te pitati nekaj… Čem je stisnula šake na stolu, znal sem kulko je vur. – Ona debela, kak se ono zvala? Jana? Je ta niškoristi još živa?
Ve sem ja moral postati Goran Višnjić i odigrati svoju rolu. Pravila se kak da je se jedva zmisli, a na sosedu Janu je imela peha… nekvi stari računi z mladosti… Samo sem Bogeka molil kaj soseda Jana nebu pokočila po vrati z tenjerom kolači…
– Jana, Jana, nekak mi je poznato… – bekljal sem… – ne misliš valjda na ovu ženu tu malo dalje od nas? Videl sem ju par pot, bogica se malo vruhnula. Čini mi se kak da je nekva betežna… Am znaš. Leta idu, nikaj ne pitaju… – lagal sem kak da sem rođen za to…
– Nikaj mi naj govoriti za leta, ta bu sto let živela i još ju bo treba z batom po čelu – mama se nikak ne dala stišati…
– Nanosila se ona vina z pelnice. Ta ti je, dragi moj sinek, podvorila sega ološa v seli. I stoječ. I ležeč. Ne znam kak da ti rečem, kurvasta ti je ona!
– Sa sreča, kaj si puno mlajši. Zasuknula bi ona i tebe kak testo za zdigane kolače. Na sreču, ako veliš da grdo zgleda, onda ji je zasigurno i kukec crkel. Ah, upropastila je ona pol sela.
– Mama, mene ništo ne zanima, a najmenje ona. Ako očem hižu i grunta v redu držati, a kičma mi je sa nikva, znaš da se jako nadelam. – Je, lepo si hižu očistil… i grunt je v redu. Nego… štela sem te pitati, nekam sem posprajla vuru, znaš onu koju sem dobila dok sem išla v penziju, štela bi si ju zeti sebom. Ta vura mi je tak pri srcu, dok se zmislim na svoje pajdašice, v srcu mi ide tik tak, tik tak…
Uf, ve se meni v glavi vužgala čerlena lampica i bilo mi je pet do dvanajst. Samo sem se ponadjal da soseda Jana vuru ne nosi na roki, jer unda bum prvi mrtvac v Novem leti. Aha, idem probat ovak.
– Mama… mama? – tiho sem rekel
– Kaj je ve pak. Naj biti kak pekmez
– Ne znam, mama, kak bi ti rekel…
– Znam kaj mi očeš reči. Našel si si nekvu fljundru i rad bi se ženil?
– Ma ne… Se zmisliš ti poštara Iveka? Ma znaš ga sigurno… ma Iveka, no, poštara, pak samo je jen poštar Ivek!
Počela je menjati boje… sram ju je bilo, još navek je patila za njim… – Aha, poštara Iveka? Komaj sem se zmislila. Znam, znam, kaj je z njim bilo? – Ma navek me pita za tebe, mama. Kak si, dal si još navek lepa visoka, da je gledel nekve slike i da te se rad zmisli… da je ne bilo sreče…
Mama je pogledala v oblok, a vuni črna kmica. Kaj ji je to soza pobegla? Za Ivekom?
Najempot je nešto pokočil po vratima. Što bi to mogel biti? Požuril sem otpreti. Majko mila! Dok sem otprel, pred vratima je stala soseda Jana z tenjerom kolači, a na roki je imela mamino zlatno vuro…
– No kaj si se zmrzel, pusti me nuter, de je Štefica? Uf, prekrižil sem se z levom i z desnom.
– Ma ma ma… tu je… v kuhinji… ajme majko moja… si sveci pomorite mi ve…
