Staro leto… stari dečko. Ne znaš kaj je bolje žalosno, Ako pak vam se pojadam kakof mi je bil Božić, bote rekli, te je baš on starinski konj kojega su zvali Zvezdan… jaki je, al pameti ga baš i nega.
Jako sem se veselil Badnjaku i kak si bom okinčil maloga boreka. No of moj biser, sosed Ivek, mi veli da zna de jega par boreki tak… samosuzrasli.
A dobro znate da v Međimurju nikaj ne zraste samo, osim ambrozije. I tak, večer, pred Badnjak, dok se smrkavalo, Ivek i ja sprajli smo se po samozrasle boreke. I još kaj bu lepše, Ivek veli, pak si ne bedasti kaj buš đunđe kupuval.
Imam ja par hiž v seli de žene od slame delaju anđeleke, a i soseda Jana je ponodila kinđurije, jer ima fanj toga. Još one male rugane porculanske, znaš, onak kak rugane ili pergane kokoši.
Moram priznati, nigdar do ovoga Badnjaka sem ne kinčil bora. No, dok velim bora… po stoti pot bi mu ftrgel glavu. Iveku. Trlcu lažljivomu. Obuli smo si batove čižme i debele jakne z krznom i štrapac. Direkt zvun sela po nekvi stezi, unda pak po drugi stezi, da bi došli na širokši pot, tu je pak bila nekva steza i zemlja ograđena žicom. Majke ti mile, bor na boru… ali mali su bili posečeni, a mam z ceste je bil jen visoki oko dva metre i nekaj.
– Fčehni toga – veli Ivek – ti si jakši. Zamahnem ja sekirom i stvarno, dva put tak i bor se vrušil kak soseda Jana onu večer. Kaj god rekli, tu ženu je ne moči zabiti. Za nju bi porušil i hektar črne jalse.
Najempot, odnekud su se stvorila svetla od auta koja dohađala se bliže i bliže. – Brzo hodi prek ceste kaj se skrijemo za grmlje – nervozen je bil Ivek. Mam mi je bilo sumnjivo. Me ne valjda te mamlaz nagovoril na krivično delo?
Tak smo močalji kak zadnji kriminalci, a unda začujemo glasa.
– Der bi si bar ta mrcina nogu i roku ftrgla koja nam je odnesla bora. Pa kak je navohnul vu to jenu vuru dok smo otpeljali turu? I baš kojega smo si ostajli za našega!
Eto, ispal sem lopov, radi toga magarca. Ali tu je priča tek počela…
Odide auto z još deset bori, mi smo čepelji za grmljem kak dve divlje svinje, rit mi se zmrzla i mogel sem se čohljati kulko mi je volja, niš nej osetil. Eeee, ve dojde ono pravo.
Pak mu moram reči… magarec, koj je nikaj ne delal i za nikaj je ne kriv, dok smo se žurilji pobeči dimo, krivo je stal z dva broje vekšom čižmom v nekvu jamu i premeknol si je nogu.
– Jaaaaj, jaaaaj – zavijal je kak nekvo marše i stvarno, gleženj je mam naotekel duplo. No stvarno, Božek pomori… Dok smo sprobalji se položaje za nošenje, na zadnje sem ga nesel pinčeke lončeke, a on je držal bora za donje steblo i vlekel ga za nami. Još je faljilo kaj moja kičma zaškriplje, makar je Ivek imel nogice kak rahitični fazan.
Dobro kaj je moja hižica v jeni mali vulici i tak smo nekak se dovlekli… No, se grdo očem preskočiti i reči… okinčili smo bora den poslje, na Badnjak, soseda Jana i ja, Ivek je z nogom na stolcu šarcal, glavu je vijal kak šprljavi papagaj, ali videl sem da je gledel sosedu Janu, a ne bora.
– Dečki, dečki, kaj bum ja z vami, ha? De ste fkrali toga bora? Označeni je… Da čujem…
Najempot smo obadva zanemeli. Ivek se brzo, onak plantavi, pobral dimo. Ja sem sosedi Jani se istinu rekel. Rekla je da sem ja ne nikaj kriv i da Iveka do Tri Kralje, za kaznu nek ne dohađa.
No, to je ne se. Z maminoga Doma su mi javili da bi mama štela još jemput videti hižicu i zgreti se pri stari peči za Staro ljeto. A unda, v Novem, more hmrti. Tak je rekla. Da oče sosedi Jani se oprostiti i da je tam v domu jako tožna i sama.
E, došel je te den… Staro je leto… Kak smo dočakali Novu i dal smo si živi… drugi pot.