Već se dogo nisam naslušal političkih i ostalih mudrijašov ka v zadnjih par let. Se neke vučene fraze, stronjski jeziki, i domoća obećuvanja i zmotancije. Čudne fele smo ti mi mali ljudi. Mi seljaci i radnici vjerujemo svima i moreš ga je… Svi nam od 1945. do dena denešnjega furt obećavaju bolji i lakši život. Političari raj na zemlji svećenici raj na drugom svetu kad ti bradu podvežu i kad ti zapopeva Iz dubine vapijem tebi Gospodine, Gospodine usliši glas moj, Neznam
Ne bi se štel mešati o kakvim paklenim dubinama nam pjeva 130. Ps. no mi navek delamo kontra. Kad nam neko nekaj propiše kaj i kak, kam ćeš većeg užitka nego vudriti kontru po svojem. Se zmislite 1971. Ovi malo ozbiljnijih let znaju o čemu pripovedam. Ja se je sjećam ne samo kaj sam se 8.7. oženil s ljubavi mog života, i vjenjčanje je bilo u crkvi Marijinog Uznesenja u Novigradu Na Dobri. Ni bilo po skrivečki ali je bilo par ljudi kaj nisu ušli u crkvu jer tobože su si baš baguša prižgali.
No oko pol noći kad smo se malo opustili, nemrem reći na čiji je zahtjev nakon drmeša odsvirano Ustani bane Jelačiću. Ka da si svatove z iglom vrit fpičil si su skočili na noge i iz sega glasa popevali. Pa čak i oni kaj v crkvu nisu ušli. I kaj je najvažnije si su znali reči. Isto se dogodilo i s Vilom Velebita. Posle su me pitali tko su oni dva kaj nisu šteli popevati. Takve nisam videl ili ih nisam štel videti.
Danas 43 lete od toga lijepog događaja mislite da se kaj promjenilo. Frišku figu. Brus. Pred dva tjedna smo brali vinograd pajdaša Tome (svekra od moje kćeri). Nakon jutarnje žganice “brbljače” i obilnog doručka društvo je bilo žejno kak graba. te je par gemišteki onak kak se šika prigodi pala je i pjesma. Započela je Miškecova žena a ostali prihvatili.
Siromah sa druže
Nigdje nikog nemam
Samo jednu staru
Skršenu gitaru.
Lepa popevka suze na oči tira. A onda se pajdaš Gubica iz sve snage zaderal – Amerika i Engleska bit će zemlja proleterska.
Bog zna kam bi taj vinogradski Factor X dospel da ni pajdaš Mrzli ni rekel da su to komunističke pjesmice i da nisu primjerene Hrvatskom puku. Hodi ti lepo vrit – rekel mu je Stekli i nastavil. Gdo je mene pital 1991. jesam li komunist ili fašist gda sam za svoje peneze kupil šmajsera, i obleku i otišel na frontu.
Pas mater pa kaj bu mi se opet branilo kaj bum smel popevati ili ne. Sad samo hodite po kletima i pišite. – Gdo ima više od 200 litri mošta mora platiti porez, jer sam to nemre i nesme popiti. Gdo ima ženu i ljubavnicu jednu nek da državi na rspolaganje. Celi život mi jedni braniju jedno, drugi drugo, a treći me silom hoćeju uvjeriti da sam slobodan, svoj na svome. Celi život me stišću, prešaju, dihati mi ne daju a ja moram biti vesel kaj sam slobodan. Pogledaj ovoga grozdeka. Direktor. Čisti nepatvoreni.
Se plemenito grožđe je zgnjilio od ovih dežđov. Nije plemenito za ove naše krajeve. Ako hoćeš meti plemenito trsje moraš ga kak političara, njegovati, brigati se o njemu, sedam do osam put moraš špricati. Pepelnica, siva plijesan, crna plijesan, kukci i grinje se se to vesi na plemeniti lozi. A ona. Kak politika. Kak kurva. Čim ju već maziš i paziš to više otrova na sebi ima. I još ju svi hvale.
A pogleć ovog našeg direktora, nohu, črnu izabelu. Raste i rodi tam gde nikaj drugo neće.
Dost je da ju jemput dvaput malo s galicom osvježiš i fertig. Čisto nepatvoreno. Denes bi Holyca rekla ekološki proizvod. Čista priroda. To malo metilnog alkohola kaj ima vu sebi je zanemarivo spram, Polyrama, Ridomila, Kosana, Quadrisa i ostalih fungicida koje na sebi nose plemenite sorte. Nije ti za nas obične smrtnike plemenito. Plemenito je navek z nas norca delalo.
Biškupi, fiškal, financi, vučitelji, doktori, razni veliki i mali poglavari, navek su zakonima i vučenim rečima z nas norce delali. Navek su nam govorili da smo bedaki i da niš neznamo. Oni su tu da za nas misliju i govoriju. No v času bi premenili mišljenje gda bi toj preštimani gospodi doma donesel puricu, racu, gusku, 20 jajčeka za fine rezance, vožicu (barilček) direktora, a bogme nisu odbijali odojčeke, kobase a ni šunkice.
Samo bi se z visoka nasmijali, potreptali po plečima i rekli. – Svaka čast proizvodi su vam vrhunski. E što sve naš čovjek može uraditi? More gosponček, more. Samo mu nedate. Okovali ste ga regulamam nametima i drugim kmetarinama da je za ponoreti.
I samo Bog zna kak dugo bi Stekli lamentiral i politiziral da pajdaš Toma ni rekel: – Fajrunt, idemo k obedu. I po starinski Hrvatski da ne rečem vinogradarski, družina se skupila oko improviziranog stola i kak negda naši stari vudrili po pečeni purici, krumpir salati, grah salati s malo bućinog ulja, orahnjači i makovnjači. Siromaški ali sve iz naše domaće “proizvodnje”.
A dika i ponos našeg trsja njegovo veličanstvo Tudum (iz prošlogodišnje berbe ) tak je klizil kroz grlo kak grešni v pekel. A laloke (čeljusti) su delale kak kastanjete. Gubica koji je inače najglasniji među nama dojde do mene i jekne me pod rebra. – Si videl?
– Kaj sam imal videti? – Za obedom je bar četvero više nego nas kaj smo delali. – Pusti to na miru. – odgovorim mu. – Mi smo ti takvi kakvi jesmo. Bu dost za nas i još bu i za te kak ti veliš uhljebe. Zdurali smo mi veće jade i kaštige. Na našu kopanju su dolazili mnogi. Neki su otišli siti i napiti a neke smo morali oterati.
Nego, daj bumo si zapopevali onu našu. Koju onu našu? Ma onu! Misliš na onuuu? Ahaaa! Onu. Daj ti počni ja bum vudril tercu.