Fučkam jo na to kaj su nas pritisnula ljeta, cukor v krvi, tlak, kolesterol, trocifrene kilice, artritis i ostale radosti trećeg doba. Ak smo zdurali onih 38 – 39 stupnjeva bumo nekak preživeli i ove betege. Sedimo, Bolta i jo pod mojim orehom, natočemo se Radlerom, brbljamo o politiki, cenama, velki suši, i kakvo bo zlo i šterčija z sega toga zišla. Dnevi su se krojši. Ljudi po mali pred večer idu vun na pot.
Šteri prejde krej grunta, mohnemo mu zdižući roku s Radlerom v zrok. Kak mu mohnemo tak mom dojde pod oreh. I dok si reke ajn cvaj meli smo već nego kvorum za zestanek mesnog odbora. Razgovori domaći, seljački. Jesi li požel, kak kuruza, prokleta suša, kuljko si kalampira dobil i kakva mu je cena, kaj je s poticajima i slično.
Kam bo to k vrogu zišlo? Ve so počeli i bike po selima krasti. Morti im šteri fali sjednicama i državnim službama? Za politiku i politiziranje nemamo cajta. Sosed Stekli veli da si moramo vum. Na vulicu i v svoje roke zeti našu sudbinu. Kaj nam bodo oni žvaljavci na vlasti pamet solili. Zritali smo mi i hujše od njih. On bi mom zdigel seljačku bunu.
Da se bunimo? Nemamo s čime. Motike su zamenile “freze”. Nemreš na pleća deti rotacionu kosu, a one stare ionako nisu sklepane i nabrušene. Za zobače znomo samo ako stonemo na njih i dobimo po gopco. Srp nemreš najti da ga išćeš s USKOK-om, jedino hamre imamo si. Pa ve ti demonstriraj. Pa kaj so to demonstracije ak se dopelaš na traktoru, i celi den čubiš, kartaš ajnc i belu, čokajući da bu nešće razmel kaj te tišće i moči.
Počelo je zvoniti Zdravo Marijo, a odnekud se stvor selski “fiškal” Gubica. To cono je nosil i za čudo užival je u njoj. Jedini folevredna konkurent mu je bil Kusa, bivši sindikalist sa ekonomije koju je kasnije u prvoj privatizaciji “kupio” hmm….
Bok dečki. Vidim da se malo friškate.
Bok. Otkud ti tak kesno? Gledi ga kak se nakinčil. Kak za parodu.
Daj me pusti. Kakva vražja paroda?
Čuj da nejdeš morti kavi mladi dovici ili snehi ? nadoveže se Francek.
Je, je baš mi je v ovim letima i po toj vručini to na pameti.
Kaj pak nismo još za hititi. Moj seksualni život išče na velko diše veli Francek.
Je, i to na škrge oglasi se nešće od pajdašov.
Čuj Gubica, a kakav je tvoj seksualni život ?
Jednoki kak i pred dvajst let.
Kak jednoki ? Daj povedaj morti se i mi vrnemo dvadeset let nazoj.
Gubica potegne iz flaše, zbriše čobe i pogleda nas onako z visoka.
Kaj za istinu hoćete čuti.
Daj ne filozofiraj. Pripovedaj. Šteri ne bi štel venodjati kak pred dvajst let?
Ovak. Sako jutro zdignem se u pol šesti vuri. Hmijem se, oblečem gotnem si jenu žganicu i durh v štalu
Tam me već čokaju, Đunđa, Šeka, Lisa, Perga i išće osem drugih. Nahičem im silažu, očistim dreka spod njih i friško nastrem. Dok ja to delam moja Biba im opere cecke i priključi muzilicu. Da zgotovimo sa štalom na redu so kotec, kočak, a nakon toga idemo na brzinu spiti kovicu . Jo pijem kovicu, a Biba sprovlja košaru z jajcima i sirom kaj bodo sin i sneha otpeljali v Čakovec tecu Tončiju i teci Juli.
Unda prejdem zbudit vnuke i spraviti ih za vrtić. Tam se posmominam s tetama i kuharicama dok se ne otpre pošta. Platim račune i ostalu kmetarinu gledeći kaj mi je ostalo od penzije. Morti za šteru škatulu cigaretlina, ili por špricerov. Koli desete vure, dopelja se veterinor plodit Cifru. I ostal sam bez 300 kun, kak Bog bez brata. Dojdu dnevi da ne znaš kaj bi prejdi počel. Oranje, košenje, sprovljanje, špricanje, žetva,kuruznica i drugi posli.
Pripraviti traktor za registraciju. Kupiti novi kardan. Popraviti pojilice za krave, v kocu premeniti kopanje, piščancima i kokošima nove lojtrice napajti, na škednju desku premeniti i na kraju se skup pošlješ vrit zakaj je den tak krotki. Čim polne odzvoni, Biba zove na obed. Po obedu, Biba pere tanjire i zdele a jo si v pormi pol vure počinem joči. Popolne malo sečemo vehje i sklodamo pod strehu. Unda naružđimo malo one domoće osmoretke kuruze kaj bo za žgonce i zlevanjku. V četiri vure skočim vu vrtič po vnuke a za toga već i sin i sneha dojdu s posla. Sneha mom vključi veš mašinu a sin z decom prejde na nogomet.Navečer pok štalica, kotec, kočak. dej pesu i močkima jesti, i već je trda kmica.
Pozapira se i zaklene se kaj treba i za te den je gotovo. Večerja lovačka. Što kaj vlovi v frižideru. Fletno dojde jedanaesta vura. Biba i ja legnemo trudni kak pesi. Velimo si lefku noć, obrnemo se svaki na svoju stranu kaj bo vjutro nazoj se znova. Eto takav vam je moj seksualni život. Aktivan, sadržajan, pun kak pred dvajst let.
Ja ga pogledam, i upitam. Čuj. A kave to veze ima sa seksualnim životom?
Viš Lajavec kak si bedast. Pa kaj ni ljepše reči tak nek da da velim prosto.
Moj jebeni život.
Pa kaj ni ljepše čuti naše političare da nam lepo veliju da smo v recesiji a ne vriti. Kaj ni lepo čuti da nam rečeju smo otvoreni za promjene, a ne da smo slekli gače pa nek nas naguzi šteri hoće.
Milina je za čuti kad ti ovi gore u vladi vele da vode socijalni dijalog, umjesto noga vrit, radnici su popušili, i slično.
Pa kaj bi si Europa mislila. Kakvi se to prostoki rivlju u EU
Pa kaj bi si naša deca mislila? Kak ih to vučimo?
Kakvi bi mi to ljudi bili?
