Kak smo čuda dnevi prije rekli – tak je i bilo
Prek ščera, 23. tretjega, čehaje v Hlapičini se je zgodilo. Več okoli šeste, pol vure prije sakoga reda, žene z Društva žena Hlapičina zglednule so prepunu dvoranu. Za doli pasti! Pa kam bo tej narod Božji šteri je f toto minotu stopram z doma geno?
Karol je po kantu mrzle vode dbežo, či bi koga v život vrnuti trelo. Neje niti gostima umetnikima z KUD-a Beletinec i KUU „Magda i Luisa” z Madžareva to lehko bilo gledati. Ali – nika, kaj je – tu je, mrti je stiska samo zarad nas, so po stihoma zmrgotali, a z vuhima veselo zmigali. Kakša tonska proba!?! Pa da i de??? Domači z prvoga reda so rekli – to se još nej doživelo, hapite se samo, tu smo šteri smo nutri zišli, a de so vrata – tam so i obloki, znajšli bodo se uni vuni.
Prvo so prelepe puce Beletinske tri starinske, domoče vdrapnule. Slike se kožeju. Grofica Erdődy, jene pucke i sluškinja Jana z KUU „Magda i Luisa” z Madžareva zakelile su dvoranu za stolce z pripovestima i običajima svojega kraja. Čovek bi mogo to cele dneve i noći gledati i poslušati.
Tišina je v dvorani bila ka se matul nej čuo z perotima mohati. Te pa so puce Beletinske još dvej potegnule. Una za žlabravo babu je kaj koga doli hitila! I stopram unda, stopram posle sih gosti so se naše žene čehati hapile.
A za to, za to kaj se unda počelo za stolom dogođati – prove slove so još nej zmišlene. Na momente je zgledalo ka bodo se zidi razčehnuli! Pa što bi si mislijo kaj tak te naše mirne i tihe žene moreju zdelovati???
Kaj kaj šteri je svoju nej niti prepozno! Micika je zvezda čehare, ali bormeš niti Jula, niti Roza, niti Franca, Mara, mater Micikina, hižna gazdarica, kak jelen fletni i živi Karol so nej niti za dlaku slabiši, a kaj pak stopram za Gloriu i Jacqueline z Švicarskoga reči – ljudi, bilo je to fčera od razonode za v cole pasti!
Drago Stojkov, precednik mesnoga odbora, jedva je suze od zadovolstva zabremzo, a Dražen Srpak, Serjojnski gradonačelnik, da je nej trelo vjutro na šihtu iti, bi još do ve reči zahvale povedo, a umetniki bi se ž njim slikali.
Skorom bi se pozabilo napisati, to, to kak se na kraju igralo, popevalo i pleskalo, sij skupa, domoči i strajnski, pa sij na skriž i na šrek, e to je nekaj, nekaj kaj bi se moralo do kraja sveta deci v školaj kozati i povedati.
Štrta čehara se jedva čeka. To bo več drugo leto, a ovo bo, to se vidi, megnulo kak da bi z puškom strelijo.
[Z aparatom poštrenkao i na paper deo Ivan Goričanec]
