I tak mi je gazdarica rekla da je pri njima i sin od moje tece. Zamisli, otkot je ve njega spuknula? Zbrisala sem si soze i misljila, no bar nešto koga poznam kaj mi nabo tak jako teško. I bormeš tak je i bilo.
Z nami za stolom sedelji su i kalfe, naši domači ljudi bi rekli – inaši. Jen od nji je bil Josip Jančec z Dobrave. Bil je sin od naše tece, Hirschlerove kuharice. Makar mu je japa brzo hmrl, teca ga z onim penezima kaj je zasljužila, mogla školati. ž
Predi sega toga, dala mu je peneze kaj plati školu i stana vu Varaždinu. A on, prefriganec prefrigani, naprajil je svinjariju. Zaljubil se v deklu i dok je išel z Dobrave v Kotoribu k vlaku, rekel je da su ga napali nekvi muški i opljačkali na Marofski stezi.
To je bila jena steza kaj je peljala napolje z glavnoga pota. Ovoga sljučaja su prijavili teca i on žandarmeriji koja je bila smeštena v Dobravi, na Marcinjaševem gruntu. Žandari su z dreseranim pesom preiskalji polje, a pes je gljedel i napadal samo njega.
Mladoga Jančeca su dotirali v žandarmeriju i spitali. Priznal je da je za te peneze kupil deklji zlatnoga prstena i lančiča, a po rokaj se sam zdrapal.
Tak se ne školal, a Hirschlerove veze, samo zaradi tece, su mu pomoglje kaj je ne dišel v rešt. Dišel je vu vojsku v Rajlovac, a tecu Regu, svoju mater, je i dalje skoriščaval.
Pošiljala mu je peneze, elj ne za dogo. Dok se moral vrnuti dimu, ostal je bez prebijene pare. Došel je k moji sestri Kati v Beograd, kaj mu najde posla.
Završil je pri Gazdićima, kak kalfa. Bil je fakin, a lagal je kaj se se prašilo.
Kak rođeni je bil za trgovca i znal se prišmajhati dok je bilo treba. Bil bi zmotal i vražjega vraga, a ne običnoga čoveka koj se podel f štacun. Gazdiči su ga štimalji. Štelji su kaj oženi njihovu čer Nataliju, elj ljubaf je prevagnula i njegvo srce je itak fkrala jena lepa srbijanska dekla z Kikinde.
Dišel je on, kakof je bil, ne za jeno mesto, za svojem životom. Pred Drugi svecki rat je premenil ime v Mile Bogdanović. Zaposljil se kak pisar na aerodrumu v Rajlovcu.
Prešlo je puno ljet i ja sem več delala kak kuharica v dobravski školi. Rekli su da me zove nešto na telefon. Prijela sem sljušalicu i z druge strane oglasil se Mile Bogdanović. Tak se bar predstajil.
– Ne poznam ja nikvoga Bogdanovića – rekla sem i poklopila sljušalicu.
Premeniti ime i zmisljiti se rodnoga doma dok se pregrmi, kaj god. Dok je bilo najhujše stisnul je repa med noge kak pes. Tak je to v življenju. Vok dlaku menja, elj čud nigdar.
Očeš se vrnuti… a ničega več nega
Kakof je gord bil te kalfa Jančec, bilo mi je toplo pri srcu dok v tuđem svetu vidiš nekoga svojega. Domačega. Teško mi je to opče govoriti, pak ja sem bila unda još samo dete.
Mislila sem si, samo da se morem zbuditi v naši hiži, da vidim oko sebe ono naše siromaštvo. Ja sem z Beograda odišla, a Josip Jančec je ostal. Sudbina ga ne vrnula v Međimurje.
V Dobravu je došel dok je hmrla teca, njegva mama i nazaj odišel. Bil je jedino dete, japa mu je brzo hmrl. Poslje sem si misljila, viš, jempot dojde vreme kaj ti se počne verteti film življenja, povlječu te koreni… očeš se vrnuti v detinjstvo, v rodno mesto, zaželješ si drage ljude… A ničega več nega…
>>> TETA LIZA Legenda i čuvarica izvorne međimurske pjesme
>>> ŽIVOT TETE LIZE (2) Nečem hmrti na kvartelju
>>> ŽIVOT TETE LIZE (3) Dvesto zlatarski čoni
>>> ŽIVOT TETE LIZE (4) Gospodine, molim dinar
>>> ŽIVOT TETE LIZE (5) Pjesma svakodnevnog življenja
>>> ŽIVOT TETE LIZE (6) Nečem nikakvu pevačicu!
>>> ŽIVOT TETE LIZE (7) Dravski vodenjaki
>>> ŽIVOT TETE LIZE (8) Svati bodo na Valentinovo!
>>> ŽIVOT TETE LIZE (9) Veseli svati se nedaju dimo
>>> ŽIVOT TETE LIZE (10) Materina molba
>>> ŽIVOT TETE LIZE (11) Starijapa Joži – mamina herbija
>>> ŽIVOT TETE LIZE (12) Reči su veter, Jano
>>> ŽIVOT TETE LIZE (13) Majalijuš i Švedska
>>> ŽIVOT TETE LIZE (14) Materino pismo
