– Soseda Jana, već nabom nigdar pil! Pokojnoga mi japice Gustija i njuvoga pajdaša, gosaka Gustija. Znal sem ja spiti dve tri pive, ali to je bilo največ kaj sem igdar spil. A ovo snočka! Majkica mila, draga i predraga, to je bila večer na koju sem trebal zabiti se svoje ljubavne jade, a kaj sem zabil? Ha, rečite mi! Zabil sem na koji strani je moja hiža, zabil sem de je zahod, zabil sem Iveka f vaši pelnici i zabil sem kak se zovem.
I na kraju, osramotil sem se pri sosedu Jandrašu. Nesem njim znal odgovoriti zakaj tuljko pijem. Kaj me gljedite, dobro kaj sem i to zabil. Da sem rekel… radi časne, soseda Jandraša bi morti kap ftrefila. Kak je cirkveno pohobljeni i malo čuden, on bi mam pital svoju pokojnu ženu, elj morti ne živeju v samostanu ili v raju.
Soseda Jana me gledela kak da me prvi pot vidi… kak da se nečega zmišljuvala…
Ona je pila čerleno vino i znam da mi je rekla… – Natoči sinek četrtoga. Navek je moj pokojni rekel da je štiri srečen broj. Nemam pojma zakaj. Morti zato kaj je do štrtoga došla penzija. Bog mu dušu zveliči.
A soseda Jana su pili dalje. Dok su rekli … dej natoči sedmoga za sreču, znam da sem se naslonil na Iveka, Ivek na kredenec, kredenec na… je, kredenec je ostal na mesti, a on i ja našli smo se med kredencom i kaučom. On ocpot, ja odzgor. Dok mi je huknul i stiha rekel … Božek pomozi, ja sem se mam stal jer sem mislil da bo hmrl. Zgleda da me zamenil z Božekom. Valjda sem ga malo preveč v kredenec pritisnul, a on je mam mislil da bo dobil krila.
Roku na srce, Ivek je na Martinje k sosedi Jani došel već fanj pod gasom. Bogek dragi, kaj ga te fačukljin more spiti. Fačukljin velim, jer je Ivek zaprav fačuk i to si v seli znaju. Soseda Jana su jako dobro poznali njegvoga Japu Martina. Bil je skretničar na štreki, a njegva mama Mara ga zasljužila jenu zimu dok se bogica s korpom na glavi žurila k prvomu cugu. V beli Zagreb je na pijac nesla sirenje i jajca, opipljanu racu, šunku i kosanu mašču. Gospoda su rado od nje kupili se kaj je donesla, jer je dekla bila jako čista i skrbna.
Martin ju je zdavnja zapazil i pajdašu na poslu je rekel da ju senja saku noč. To jutro je bil jako debeli sneg, zapal je posle Seju Sveci i nikak da zima otposti. Martinu je bilo žal dekle koja samo kaj se ne zmrzla z onem teretom i pozval ju je v kučicu na par minot kaj se malo zgreje. Tam nutri se i resplakal pred njom i rekel ji da se ženi, mama i kuma i teca Treza po japi su več se dogovorile. Tri dni posle, to subotu su išli snoboki snobočit Martina za Magdicu, onak, deklicu niti lepu niti grdu. Martin se oženil za tri mesece z njom… skretničar Martin, Ivekof japa.
A Iveka je naprajil Ivekovi mami Mari pred svoje snoboke, v mali kučici pri štreki, malo zvun sela.
Kak se ftrefilo kaj ji ga fteknol, vrag bi si ga znal. Ona je bila sramežljiva, ali navek ga pogledavala spod joka… i tak mu je dala… iskra je kresnula i došlo je do deteta.
Dobrostoječa familija dogo je lagala da Marica ima zagrebačkoga gospona v Beču, lagali su i da je zmišljeni gospon nastradal v lovu, kajti se ne nikak pojavil v seli, a si su ga čakali kak žeđna zemlja dežđa. A negda je tak bilo. Znalo se dobro što je čiji, posebno jer se i den denes dobro zna da fačuk od se dece najbolje je sličen jocu.
No, dobro, kaj prekratimo, od dneva dok je Ivek zeznal da mu se japa zove Martin, a to je bilo na den dok ga mama Mara sprevađala vu vojsku, Ivek je mami obečal, dok se oženi, da mu se bu najstareši sin zval Martin, po njezinemu nesođenomu. Ivek je došel z vojske, a mama mu je za dva mesece hmrla. Tak je na tem ostalo…
… a japa Martin, stari je čovek, veliju da je još živ i da je v domu v Orehovici. Sa sreča kaj je mama hmrla i kaj ne vidi toga svojega maloga štopljina kak zvrnda na sako Martinje. Saki pot ga najdu pijanoga na drugem mesti. Jemput kre lagva, drugi pot v nečiji drvarnici, treći pot poscanoga v njegvem krevetu i tak Martinje za Martinjem…
Soseda Jana se pripila i nemre se zmisliti kaj je dalje bilo. Nekak je zapožarjena stalno, more biti od vina. A stvarno, de bi ona mogla prespati to noč, valjda je srečno stigla do kauča. Ako je i de drugdi spala, ništo nebu znal jer se prva od nas tri pribrala i došla k pameti.
Dok velim k pameti, toknem se po ne znam koji pot po čeli, jer ja sem vam završil Martinje ne na svojem gruntu, ne vu svoji hižici, nego malo dalje prek pota, pri sosedu Jandrašu. Vruhnul sem se v njegvem ganjku kak letva, a on dok je vužgal svetlo i videl me, mislil je da se njegov brat vrnul z Drugoga sveckoga rata, da je živ i ne znam kaj je se ne mislil. Ja sem mam bil na čisto da su to ne naše deske, mislim pod, jer naše su bile lakerane. Navikal mi je zakaj sem tak pijan došel z rata, da je rat ozbiljna stvar i da se ne treba zajebavati s pijačom.
O majkica mila, der bi on znal da je moje telo i den posle Martinja kak s tenkom pregaženo, morem mu obečati, onak junački, nek se v seli rodi i sto fačuki da več nigdar, nigdar i sto put nigdar nabum pil.
