Denes celi bogi den dešč curi. Ivek i ja smo pri sosedi Jani. Kaj da vam novoga velim? Pak mlatimo praznu slamu šlajfar i ja, a soseda Jana dremaju. Ivek veli da je na radiju rekel dežđa se do torka. A što bo toga mljinca za kavu posljušal još dva dni? Veronika se bo vrnula tijam za dva tjene.
Moja glava je ve kak f škerljaku, jer, moralo bo biti kak ona reče. Brojil sem peneščece koje sem zešparal. Mislim da bo dosti za malo bolji prsten. Ona je toga vredna. Ne moči reči. Zgodna je, se zna delati, nabom željen niti kolači z orehi, niti pak mi bo košulja zdruzgana. Hiže imamo, se nutri imamo, japica su mi ostajli resa z tridesti hrasti.
Bokibogme ve su več debeli kaj Ivek i ja nemremo steblo opkrožiti z rokami. Spilili smo jenoga, skalali i scepali. Mislim dva dečki sela su ga. Unda smo Ivek i ja pomali slagali v drvarnicu. Složili smo za dobri dvanajst metri. Taman. Ako bu zima jaka, kurim taman do majuša.
Od ove jeseni bom moral biti ozbiljen i spameten kaj ju nigdi ne osramotim. Jer, ako ona reskera črnu suknju časne sestre, unda i ja moram biti pravi muški.
Tak si mislim i gledim Iveka kak dremlje za stolom. Da nema glavu, dešč bi mu ljefko curel v želodec. To vam nemrem povedati, elj nekak ga imam jako rad. Imaš nekoga rad, a nasanjka te sako malo kak šmerkljifca. On veli da i zajebant treba znati biti. Več je tri pot rekel da mora iti prascu Martinu dati ščavu i samo se nikak stati. Sosedi mu zamerjaju kaj mu je dal takvo ime, ali Ivek ima sako leto drugoga Martina i za sako Martinje ima i Martinje i kolinje.
Kupil si je dvesto liternu škrinju i za zimu si meso poslaže v njo, kak patekarka vračtva. Pak vam ide ovak. V pondeljek rebra koja kuha z kiselem zeljem, v tork dene naseckano meso malo na saft i kcoj makarone. Sreda je zabezecerana za juhu s kostima. Kosti tak ftek globlje kaj mu proteza tu i tam se omekne. V četrtek poha šnicljine i slaže kalampajsanoga kalampera. V petek se posti. N
e znam bi mu veroval ili ne, rekel je da je ne nigdar bil zaozbiljno pri doktoru. Jer, dok posti, unda si z žganicom spira grlo, ali ne pogotne ju. Veli da je pona paraziti i bakteriji i da od grgurenja sa gamad pocrka. Pogotne samo zadnje dve. To veli da je za saku sigurnost. Je, v subotu peče čurke i graha kuha. V nedelju sega pomalo, čak smo jempot jeli i meso z lodrice. On veli da formule nega. Kaj želodec išče, to mu dej. Otprilike tak. Stvarno poleg takvoga jela, navek se pitam, zakaj je tak mršavi i nikof. Ne bi o šalati. Jer bom moral dojti do vugorka, a unda mi bo slabo.
Mi sedimo za stolom, a več je večer. Je, zabil sem reči da je sosedi Jani gleženj levi v langeti i da to od zadnji pot dok je pala v ganjku. Več je rekla da nigdar nabo gatala, jer ji je to za kazno. Jako se zbesila da bi ju njezin pokojni zakoniti ljefko malo bolje kaznil. V celi nesreči je sreča kaj je samo gleženj. Ona tak veli, da je z gležnjom postrugnula po poceku i da je nekaj škljocnulo. Pala je na rit, tak da je ne nikaj drugo stradalo. Ivek se zajebava da je z jene strane dobro kaj ima rit kak jabuku širokljaču. Da ima kak jaboko mašonjku, unda bi ji ljefko bila stradala i kičma.
To se mi spominamo dok ona ne čuje, jer stari ljudi navek veljiju da pravo selo mora meti i krčmu i cirkvu. I unda se smejemo kak bedaki.
Pobral je Ivek i posprajil jaboke mašonjke v pelnicu, kaj bar deset obesi na bor. Jaboke su za zdravje, tak veliju veličasni i stari ljudi. Kaj se njega, mislim Iveka dotikavle, ne znam dal je koju jabuku da pojel. Morti bi i nejmu od koje širokljače rit se pojačala malo, a što zna? I muški imaju svoju cirkvu, moj japica bi to bolje znali reči.
Soseda Jana su otpreli joči.
-Senjala sem kak se ftičice na grani spominaju. Tak su skakale jena na jenu stranu, druga na drugu. V jen mah se činilo da se bodu z kljuni doteknule, ali je jena jako počela žifkati kak da se svadi. Druga je štela na njo skočiti, prva se pomeknola i tak su se svadile i nikak se pomiriti.
– Znači, ne mu je dala – rekel je Ivek pomali. – Takve su žene. Mi muški smo kak bedaki. Skačemo oko žene kak da je od zlata.
– Dej se malo sredi. Ako pak se zmislim, ti si se stvarno naskakal oko nji. Ve dok ti je kukec crkel, ve boš kokodakal kakve su žene. Kaj ne soseda Jana? – štel sem ju sprajti v dobru volju.
– Ah, dečki dragi, morti vam bu i žal, ali stvarno su kurviši ne kak su negda bili. Nem se vračala v mladost jer mi mam soze skočiju. Unda je bilo dece kak posejane. Denes si rajši kupe peseke i to je to. Nega več skrivečki nikaj. Jako je to, jako žalosno. Ne znam što bi se ve tak zaljubil, kaj bi čula da bodo skoro svati. Ove ftičice mi nikak nejdu v račun. To je pak nekof grdi znak. Kak da se nešto imel rad i da se rezišel.
Mene su mam škrapi prešli. Je to ne morti senjala Veroniku i mene? Jezuš… Jezuš!
– Soseda Jana… – rekel sem pomali. – Su ftičice mele sivo ili pak črno perje?
– Črno, črno, to me i sekera. To je pak nekof grdi znak. Ne baš dobra vest.
– Soseda Jana, a je ta ftičica koja se jako svadila mela dogo perje ili pak kratko?
– Znam na kaj ciljaš! Neje bila slična časni sestri – resrdila se
– Ali je zato rekla… amen, kaj nete soseda Jana? Ha ha ha dragi moj pajdaš, to ti je tak dragi Božek dal, zato kaj ste me ostajli na Dravi kaj sem se rezmakal kak negdašnje pumparice v Radionu. Znaš onoga praha z žotom zvezdom? E, se ti to život poravna, završil si ti školu, elj još ti malo fali. Fali ti životna škola. To je bila tvoja ftičica.
– Kaj to blodiš, Ivek? – soseda Jana je zakmečala kak prasička.
– Kaj ti to znači? – nesem mogel verovati da čujem te reči.
– To mi znači, soseda Jana, da se bomo celu zimu pri miru kartali si tri, a ne samo Vi i ja… ženska ftičica je rekla … amen.
– Pak ne razmen nikaj – rekla je soseda Jana malo glasneše
– Teško je to razmeti. Mislim da niti moj Martin nabo razmel zakaj je do ve žeđen kak spužva. Bogec prasec. Ljefko noć, soseda Jana, ljefko noć, pajdaš…
– Čekaj malo – viknul sem, ali škorjanec je brzo skočil na becikljin i zgubil se v noči.
– Soseda Jana, najte nikaj zameriti, moram dimo, glava me boli.
– Ljefko noč i ne sekeraj se, ako jena ftičica odleti, druga doleti…
-Nega druge, samo je jena jedina prava… ljefko noč, soseda Jana.
