Dok so mamica hmirali, bil sem još mali dečker. Pamtim da se mama Štefica jako plakala, a tata, Dalmatinec, nikaj je ne razmel dok su se spominalje. Mamici Regi sem obečal, ne bi veruvali, da bom jako dober i da se bom, dok dojdem v penziju, vrnul v Međimurje. Dok je mama čula da su mamica, predi nek su hmrlji se prepisali na mene, naručila njim je onu najfalješu raku. Žene su si, dok su verestuvale, tiho šeptale:
– Navek je bila škrta, ali ovo smo se od nje ne nadjalje. Jedinka, na penezima spi, a mater si zakapa kak zadnju sirotu. – Toga Dalmatinca je zgrabila, za zapitati se kak. Jako haklik pitanje – rekla je Jana s kojom je moja mater imela stare račune za poravnati, a unda su se kre kapure se štiri tak nasmejalje, kaj su se ljudi križali.
I tak smo se vrnuli v Zagreb, a tata i ja smo saki mesec došli na moju herbariju i se lepo počistili i pokosili. Tata je niti ne znal da se mama sosedom Janom jako posvadila predi nek je njega srela i to zaradi Iveka z vulice. Jana mu je čak i dala, znate več kaj, a na zadnje je ne oženil niti jenu. Njegova mama je za njega štela bogatu, a ove dve su ne baš bile z peneznati familiji.
Tak vam se to unda v životu posložilo. Mama je završila v Zagrebu i zefčila se za švelju, a tata Ante, kondukter v tramvaju, brzo ju je smotal. Ja sem se narodil baš pred Vuzem. Mamica su v Zagreb, tata je navek pripovedal, suhu šunku od dvesto kilne prasice Mice, do stana dopeljali z taksijem.
Mama je od srama štela v zemlju prepasti, a mamica Rega i tata Ante, napili su se kak črna zemlja. Niti soseda, z kata više, je ne drugi den odišla na posel. Bila je bleda kak domača plafta Skutili su se sosedi kak Bog zapoveda, a tata je, onak pijan kak klada rekel: – Dragi moji, ja vidim sve zvijezde. Rodio mi se sin! Sin! – bekljal je, a mama mu se naprajla norca i tak sam ja dobil ime Zvjezdan. Ftruc. Po zvezdama koje je videl.
Posle je tati bilo žal jer ga se familija skoro odrekla, ali kaj bodo ve. Trebal sem biti Lovro, na pokojnoga dedu Dalmatinca, ali več su me zapisali kak Zvjezdana. Denes mi je opće ne žal. Dojdem f Prilok, v svoju staru hižicu i gledim zvezde. Nigdar sem se ne oženil.
Ostal sem stari dečko. Valjda radi mame. Niti jena ji je ne bila dobra. Mladi sem v penziji radi operacije kičme. Pred leto dni pokopal sem tateka, am je bil siromak, dober kak kruh. Istina, spil si je, ali što i ne bi pil poljek takve žene. Mama ima šečera i v domu je. Prošli tjeden mi je rekla, dok sem bil pri njoj da ima još samo jenu želju. Zmlatiti Janu. Ah, mama od sprevoda nije štela dojti v Prilok i ne zna da je Jana još dobrodržeča dovica s poprsjem četvorkom i da bode te boks meč ostal zanavek samo neporavnati račun.
I Ivek je, baš radi svoje mame, ostal stari dečko. Navek komaj čaka kaj dojdem. Penzijicu resteže od prvoga do prvoga kak žvakaču kaj mu se dojde. Poštara čaka pri potnemi vrati. Prošli put dok sem bil v Međimurju odišli smo do Marine. Naše Drave. Tak je bila vedra večer i puno toga smo si rekli. Par zvezdi je palo vu vodu i Ivek si je rezvezal jezika. Pospominali smo se onak muški.
Rekel mi je da je Jana još dobrodržeča, a njemu je več jako velki problem… zdignuti ga. – Napinjam se, napinjam, ali nejde – obrnul se od mene i samo kaj mu se soza ne spostila. Ljupil me po plečima i namignul. Štel mi je reči da mi nej priškodilo malo gimnastike. Ne bote veruvali, baš te sekunde je jena zvezda pala vu vodu. Moja Drava… – mamica su negda rekli da samo moraš zapreti joči i zaželjeti želju. I Ivek i ja smo jako dogo žmerelji i kak norci stali na mesečini.
A unda smo spili saki po pivu kaj smo si donesli i brzo zabili na zvezde. Nesem mogel k sebi dojti kakva je ta Jana v postelji. Ako Ivek ne laže, za potrti postelju moraš biti pravi težak. Jemput su ju potrlji, takva je to ljubaf bila. Rekel je dok su ljeteli s postelje, a Jana je doletela na njega, videl je i nebo i zvezde.
Do doma me nagovarjal nek se primem posla. A znate, nesem ja baš pri nekvem seksualnemu znanju. Ako je Jana, kak Ivek veli, još tak žilava, hudo mi se piše. Ivek me nagovoril. Zutra navečer bum odišel pozdraviti sosedu Janu. Rečem da ju mama pozdravlja. Što bu znal da sem zlagal? Da ji je se oprostila. I šivanje glave i potrto koljeno.
A soseda Jana bu sigurno odmahnula z rokom i narezala nekaj na tenjer. I donesla z pelnice črnjaka. Verujem da bu se došlo na svoje mesto. Spametna je bila moja mamica Rega. Znala je komu i zakaj ostavlja herbariju.